Cast in bronze, sa Sardigna nuràgica torrat a bia
Prima in Barùmini de sa pellìcula de sa NOR FILMS
Sàbadu 29, pro sas tzelebratziones de sa Die de sa Sardigna, in Barùmini, in sa sala cunvegnos de su Tzentru de comunicatzione e promotzione de su patrimòniu culturale Giovanni Lilliu, sa NOR FILMS de Frantziscu Cheratzu presentat Cast in bronze, curtzumetràgiu dirìgidu dae Mario Giua.
Si cumintzat a sas 19,00 cun sa presentatzione de sos atores e a coa ddo’ant a èssere duas projetziones, a sas 20,00 e a sas 21,00.
Sa pellìcula cheret rapresentare sa realidade de sa Sardigna nuràgica, fache a su 1.200 a.C., est a nàrrere sa de una sotziedade tzivilizada e non bàrbara. Sos protagonistas sunt duos pitzocos unidos dae s’amore e istesiados de pare dae su dovere: Ietocor, destinadu a èssere gherreri e Iscurti, chi at a èssere satzerdotissa.
Sos intèrpretes sunt Mauro Massa e Emanuela Fanni, mentras su babbu de su pitzocu est Federico Saba e sa satzerdotissa betza, chi imparat a Iscurti, est Lia Careddu.
S’iscenegiadura est de Mario Giua Marassi e de Andrea Garau, bortada in una elaboratzione de protosardu dae Mauro Maxia.
Pro s’iscenografia, a incuru de Frantziscu Cheratzu e Piero Obinu, ddo’at àpidu sa consulèntzia de archeòlogos e espertos, cun atentzione particulare a sos nuraghes, a foras e a intro. In s’arena si bident istàtuas fatas dae Salvatore Pinna.
Sas armas e sa bestimenta ddas ant realizadas Alessandro Atzeni e Sandro Garau, pro The Nuragic Foundry, su sòtziu Memoriae Milites e Martina Senis. S’imbarcatzione est fata cunforma a sos inditos de Maurizio Frau.
Sa pellìcula est istada girada in Pabillonis, e at tentu s’agiudu de sa Regione Autònoma de Sardigna e de sa Fondazione Sardegna Film Commission.
Un commento