Binti annos de Camineras
Tzelebratzione intre su passadu e su presente de sa rivista
Binti annos a como naschiat Camineras, rivista de sa manca sarda anticolonialista. A dda fundare, in su 2002 sunt istados Antoni Buluggiu, Paolo Mugoni, Ninni Tedesco, Cristiano Sabino, Salvo Zedda, Mariolino Murtas e Aldo Borghesi.
Su grupu de redatores chi ànimat su periòdicu at chertu afestare custu anniversàriu in Il Vecchio Mulino, in bia Frigaglia, in Thàthari, tzitade in ue su giornale est nàschidu.
Ant faeddadu de s’istòria de sa publicatzione e de sa situatzione de como, siat de sa rivista siat de su giornalismu isulanu, Paolo Mugoni, Daniela Piras e sa diretora Ninni Tedesco, chi at ammentadu finas sos cumpàngios de biàgiu chi si nche sunt andados.
A s’ùrtimu nùmeru, essidu in su mese de trìulas de ocanu, at cuntribuidu puru Pier Giorgio Pinna, giai firma istòrica de su grupu editoriale Caracciolo, chi in s’interventu suo at apretadu sos redatores a ocupare s’ispàtziu bòidu lassadu a dispositzione dae un’imprenta sarda chi tenet sas manos acapiadas dae ligàmenes polìticos e impresariales.
De su matessi tonu est istadu s’interventu de Alberto Pinna, giornalista, chi cun sa tipografia TAS at imprentadu pro annos Camineras.
Fiat presente in platea ateruna firma istòrica de sa rivista, su professore Federico Francioni.
A pustis de annos de autoprodutzione dae carchi tempus Camineras est publicada dae Condaghes, semper pro more de su Sòtziu de sos Sardos, chi est mere de sa testada.
In su blog camineras.blogspot.com si podent agatare artìculos e aprofundimentos iscritos pro su prus intre unu nùmeru e s’àteru, pro tènnere semper una mirada in s’atualidade.
G.M.
