Saint Exupéry i’ l’Ariera

Lu manzanu di lu 31 di triura di lu 1944 l’apparecchiu da ricognizioni Lockeed P-38 Lighting F-5 di Antoine de Saint-Exupéry si pisesi in boru da l’aeroporthu di Borgo, in Cossigga, pa’ non turrà mai più. A li 10:45 z’ipparisi da li radar mentri era sobra lu mari di Marsiglia.

In chisthu modu mistheriosu iscisi d’iscena l’autori di Lu Prinzipinu. Ancora oggi no è siguru si sia morthu propiu la dí. Tra lu 1998 e lu 2002 ani agattaddu un brazzarettu di lu pirota e l’aeropranu i’ lu fondu di lu mari. I’ lu 2008 l’ex pirota di l’aviazioni miritari tadescha Horst Rippert à dittu d’assé isthaddu eddu lu reppunsabiri di l’abbattimentu di lu P-38 di l’ischrittori franzesu. Lu coipu parò no è mai isciddu a pizu. Si pensa chi Saint-Exupery, recuparaddu vibu in mari da li tadeschi, sia morthu pa’ li feriddi, ma è soru un’ipotesi.

Primma di chidda ulthima missioni abia passadu un tempu in Sardhigna, cu’ l’americani i’ l’aeroporthu miritari di Fertilia, sempri cumenti pirota di ricognizioni e senza aimi i’ l’apparecchiu.

Da lu 10 di maggiu a lu 14 di triura, candu era parthuddu pa’ la Cossigga, l’ischrittori era isthaddu i’ l’Ariera. A chistha ulthima fasi di la so’ vidda à dedicaddu un libru l’algharesu Massimiliano Fois, intituraddu Antonie de Saint-Exupéry ad Alghero. Pizzicaluna a l’Alguer, cun un riferimentu a l’immusgiu soiu, pique le lune.

A accumpagnà lu contu di l’ulthimi mesi di l’ischrittori franzesu so li fotografii fatti da John Phillips, lu fotoreporter americanu amiggu di Saint-Exupéry e in piú lettari di l’autori.

Isciddu i’ lu 2023 pa’ l’edizioni Nemapress lu libru è un’omaggiu chi Fois à vuruddu fa a la ziddai soia e a la figura di un passunaggiu chi pa’ la vidda avventurosa, l’obari poetigghi chi à lassaddu e la morthi ancora mistheriosa è intraddu i’ lu mitu di la letteraddura.

(gianni muroni)