Luigi Canepa, un’innommu chi a Sassari vo dí musica
Lu cumposidori è isthaddu unu di li protagonisthi di la vidda culturali di la ziddai tra li dui securi, XIX e XX
Lu masthru di musica, liutaiu e corthigianu piemontesu Davide Rizzio è un passunaggiu chi à un ruoru, mancarri minori, i’ l’isthoria culturari di Sassari.
Intraddu a lu sivvizziu di la regina d’Ischozzia Maria Stuarda cumenti musicanti, dabboi era dibintaddu lu segretariu d’edda pa’ li rerazioni cu’ la Franza.
La girusia di l’althri corthigiani e la so’ fedi cattorigga abiani aimaddu la manu di uniguanti nobiri protesthanti chi l’abiani ammazzaddu i’ lu 1566.
A Rizzio, e inogghi arribimmu a Sassari, abia dedicaddu un’obara lirica, i’ lu 1869, cu’ lu tituru di David Rizio, lu cumposidori sassaresu Luigi Canepa. Lu librettu vi l’abia ischrittu Enrico Costa.
Canepa, naddu in una famiglia d’origini ginubesa, era arribiddu a assé una zerebriddai i’ lu mondu di la lirica itariana.
Abia ischumenzaddu a isthudià musica in Sassari e dabboi abia sighiddu primma in Napuri e dabboi in Milano.
L’althra obara chi abia auddu suzzessu, dabboi di lu Rizio, era isthadda I pezzenti, cun librettu di Fulvio Fulgorio.
In più v’è d’ammintà lu Riccardo III, rapprisintaddu i’ lu triatu Carcano di Milano, undí già abiani rapprisintaddu lu David Rizio. I pezzenti inveci l’abiani rapprisintaddu i’ La Scala.
Fabiddendi di triati, propiu Riccardo III abia inauguraddu lu Politeama di Sassari i’ lu 1884.
Canepa cundibidia cun althri passunariddai sassaresi di lu tempu, cumenti Enrico Costa o Pompeo Calvia, l’idei puritigghi. Infatti abia finze dagaddu l’isthudi pa’ andà a ghirrà cun Garibaldi i’ la battaglia di Mentana, vinta parò da l’Isthaddu Pontifizziu.
La so’ carriera arthisthigga s’era interrumpidda a mutibu di una maraddia e i’ l’ulthimi anni era turraddu a Sassari undí abia fattu lu direttori di l’Isthitutu musicari, naddu cumenti Civico Istituto Musicale.
E propiu chistha isthituzioni, sarradda e turradda a nascí uniguanti volthi, finze a la costhituzioni di lu Conservatoriu i’ lu 1968, è dedicadda a lu cumposidori sassaresu, chi sempri in Sassari è morthu i’ lu 1914.
(gianni muroni)
(Attività realizzata col contributo della Regione Sardegna – IMPRENTAS 2025-2026. LR 22/2018)
