L’Isthintini i’ la linga e i’ la memoria

La linga, la tradizioni marinara e l’isthoria di l’Isthintini s’agattani tutti canti, liaddi a pari, in Da Posthu Camugli a li Calanchi, di Valentina Calvisi.

Lu libru nasci da un’eraborazioni di la so’ tesi di laurea, dedicadda a lu lingaggiu e a la teiminorogia marinara di la so’ bidda.

Attrabessu la linga, una di li varieddai di lu turritanu, Calvisi zi fazi cunniscí l’isthoria, da la piú antigga a la moderna, di chisthu loggu a occi a l’Asinara.

Ed è da l’Asinara chi erani giunti, i’ lu 1885, li chi l’ani fundaddu, dabboi chi lu gubennu itarianu zi l’abia buggaddi pa’ puní i’ l’isura la coronia penari.

Erementu fundamentari di chistha comuniddai era la pescha e di li diffarenti foimi di pescha la chi piú à infruenzaddu l’acurumia di l’Isthintini è la di lu tunnu.

Pròpiu di la tunnara fabedda unu di li primmi capituri. La prisenzia di pischadori liguri, carlofortini e businchi à cuntribuiddu a arricchí lu lessicu isthintinesu, dendiri un tonu parthicurari chi esci a pizzu, più di tuttu, i’ la descrizioni di li barchi e di li rezzi impriaddi da li tunnarotti.

A più di un grossariu chi auni li parauri di lu mondu di la pescha e di l’animari marini, v’è puru una parthi dedicadda a la toponomasthigga di la bidda, cun un erencu di innommi di loggu, di l’Isthintini e di l’Asinara, antigghi, calchunu oggi poggu usaddu e calchun althru chi è isthaddu, cosa chistha cumuni a tutta la Sardhigna, itarianizaddu, fendiri pirdhí lu significaddu originariu.

Lu libru è cumpritaddu da poesii, dicci e fotografii, una di chisthi di la fini di lu di dizennobi securi, chi dazini una visioni di la comuniddai i’ lu tempu.

Da Posthu Camugli a li Calanchi, chi fazi parthi di la collana Quaderni Stintinesi, è isciddu i’ lu 2018 pa’ l’edizioni Edes, cu’ la collaborazioni di lu Centro Studi sulla Civiltà del Mare e per la valorizzazione del Golfo e del Parco dell’Asinara, di lu Museo della Tonnara di Stintino e cu’ lu patrociniu di l’unibessiddai di Sassari.

(gianni muroni)