Lu Gremiu di li Viaggianti à li obreri nobi

I’ la dì di lu Corpus Domini la Cunfraria di li Viaggianti (o di li Carrattuneri) s’è riunidda i’ la gesgia di Sant’Aosthinu pa’ un ritu antiggu, chi si ripeti dugna annu in chistha occasioni. Fabiddemmu di l’esthrazioni di l’innommi di li parai di lu gremiu, ciamaddi in itarianu, cun una paraura d’origini ippagnora, “obrieri”. In parthicurari so tre in tuttu: paraiu mannu, paraiu di candareri e paraiu (o “terzo”) di cappella. E propiu i’ la cappella di lu gremiu, undì è rimunidda la sacra immagini di Nosthra Signora di Buoncammino, patrona di l’antigga cunfraria, dumenigga passadda è isthaddu ziribraddu lu ritu di l’esthrazioni. Sempri la tradizioni dizi chi un pizzinnu è ciamaddu à isciubarà tra tre innommi dentru a un saccu minuddu. E cussì l’obreri mannu pa’ l’annu gremiari 2026-27 sarà Alessandro Carta, l’obreri di candareri Nicola Senes, chi è puru lu sigritariu di la cunfraria e chi dumenigga à prisieduddu la zirimonia, e l’obreri, o lu di tre, di cappella Simone Cossu. Lu ritu è ripituddu  da lu 30 giugno 1633, candu vi fusi la traifuimmazioni di la Confrarìa de Itria in la Confraternidad de los Viandantes, chi dabboi è dibintaddu di lu gremio d’abà.

Un althru mamentu di la tradizioni è isthaddu, dabboi di l’esthrazioni, lu giuramentu di li gremianti, prisenti mossignor Antonio Tamponi, vicariu generari di l’azzibeschamu e padrinu ipirituari di lu gremiu. Mossignor Tamponi à ziribraddu la messa.

(lf)

Attività realizzata col contributo della Regione Sardegna – IMPRENTAS 2025-2026. LR 22/2018