Giovannino Giordo, lu masthru

La dì cuattru di maggiu 2015 è ‘sthadda una diadda pa Sassari e li sassaresi: si n’andaba l’artistha Giovannino Giordo. Cussì è ‘sthadda pa tutti noi. I’ l’accetzioni di chisthu “noi” v’è tuttu lu cori di ca ricunniscia, e ricunnosci, i’ la figura di Giovannino un ommu chi raprisintaba bè avveru l’identiddai sassaresa. La dì li sassaresi l’ani sabuddu da la nutitzia chi di passona in passona ani pigliaddu tutta la tziddai. Giovannino Giordo tz’à lassaddu a settant’anni di chissu sabaddu a sera, ma abarà assé immurthari i’ li cantzoni soi. È ‘sthaddu un’artistha chi, di fattu, fazia risisthentzia linghisthiga in una Sassari poggu attenta a l’impreu di la linga soia

Un masthru, è l’opinioni di ca l’ammenta ancora. In una tziddai indì l’itarianu, in foimma forthi e fruschina fruschina, à pigliaddu tutti li logghi di la linga nosthra, e indì l’isthituzioni e l’ischora l’ani buggaddu fintzamenta l’arenu, v’era la cantzona folk a ammintà a li sassaresi, e no soru, chi v’era ancora lu sassaresu chi pudia assé trattaddu. E v’era eddu, Giovannino, la bozi di la Sassari vera, cun li brani soi, a volthi allegri e a volthi seri, a volthi cossi puru, chi faziani cantà li passoni, manni e minori. Lu sassaresu, tandu, iscià da la cueza e si fazia linga libara e si cumprindia di cant’era, e cant’è, beddu e aimmuniosu chisthu fabeddu.

Tanti cu’ lu cantu di chisth’ommu, ani cumpresu chi la linga nosthra no era d’ischibiddà ma d’isthimà. Canta Sassari, umpari a lu Zarrettu, Sassari, A l’Argentiera, Cumenti un sonniu, Pozzu di bidda, Lu lamentu di lu zappadori, Li campani di Santa Maria, Agnireddu, Indorriè indorriè, L’orthuranu sassaresu, Pinsendi a te, e tanti althri ancora, ani fattu l’isthoria musicari di Sassari e so sivviddi a ipuntuglià lu rischattu linghisthiggu di lu sassaresu. La cantzona sassaresa, chi è abbisumeu è poggu ciamalla folk, era, e po assé ancora, un media di opposizioni a chissa puritica itarianofira attausghadora di la linga nosthra. Chi li giobani nosthri, tandu, andiani addanantzi pigliendi lu tisthimoniu chi à lassaddu chisthu masthru. 

Abà a ammintallu cun afficcu, a dez’anni da chissa dì, v’è un eventu impurthanti orghanizaddu da l’assutziazioni culturari pisadda a eddu e chi d’eddu piglia l’innommu. L’initziatiba, imparthudda in dui di, la di 4 e 5 di triura in piatza Kennedy a Latti Dotzi (Bosove) in Sassari, abarà a ammintà la frigura di l’artistha e di lu patrimoniu chi tz’à lagaddu. L’eventu è patrocinaddu da lu Comuni di Sassari, Fondazione Sardegna, Centro sportivo italiano e da l’Ersu chi in chistha manera ipagli la cultura musicari e linghisthigga i’ l’isthudianti. Lu prugramma è imparthuddu digussì: Vennari 4, a li 9 di parthi in sera, v’abarani a assé li Fiore Nero e Nomadi Tribute, e a li 10 di parthi in sera Pino e gli anticorpi. Sabaddu 5, a l’8 e mezu di parthi in sera, v’abarani a assé l’artisthi Mauro Galleri, Nicola Deriu, Domenico Frisciano, Giuseppe Zucca, Sassari Vecciu, Sintonia, Pa Casu, Armonie Sassaresi di Claudio Chessa. Li dui dì abarani assé prisintaddi da Cristian Luisi.

Fabritziu Dettori