Festha di li Carabineri puru in Sassari
Vennari zirimonia i’ la caseima “Gerolamo Berlinguer”, prisenti l’autoriddai di la ziddai
Vennari zincu di lampada, i’ la caserma “Gerolamo Berlinguer” in via Rockefeller, li Carabineri di Sassari ani ziribraddu lu 212 annibessariu di la fundazioni d’eddi. Una dì impurthanti, acchì i’ lu 1920 la bandera rizzibisi la prima Midaglia d’Oru a lu varori miritari pa’ la parthizzipazioni a la Prima Gherra Mundiari.
A la zirimonia in Sassari v’erani autoriddai ziviri, ririgiosi e miritari, umpari a zittadini e ischorani. Erani in fira reparti territoriari e ippizziariddai dell’Arma. V’erani puru li gonfaroni di lu Comuni di Sassari e d’althri amministhrazioni, l’Associazione Nazionale Carabinieri e li assozziazioni di li cumbattenti.
La zirimonia è isthadda abertha da la littura di li comunicazioni uffiziari di lu presidenti Sergio Mattarella e di lu cumandanti generale Salvatore Luongo. Dabboi, lu cumandanti provinziari, coronnellu Antonio Maione, à saruddaddu li carabinieri caggiuddi in seiviziu, in parthicurari Ciriaco Carru, Walter Frau e Sebastiano Marrone.
Lu cumandanti Maione à ringraziaddu li Carabineri di lu nord Sardhigna pa’ tutti canti li sacrifizzii chi ponini dugna dì: «Torru grazia pa’ lu trabagliu mannu, impriaddu cun prufissionariddai, sempri a lu seiviziu di la zittadinanzia e pa’ rippundì a li nizzissidai e la sigurezia di tutti». Ippiriziari puru lu ringraziamentu ai li Carabinieri Forestali, chi tuterani lu patrimonir nuturari e ambientari di l’Isura.
I’ la sigunda parthi di la zirimonia l’autoriddai isthituziunari prisenti ani intregaddu li encomi. Chisthi l’innomi: capitano Marco Campagna, cumandanti di la Cumpagnia di Bonorva; maresciallo ordinario Eleonora Fega, maresciallo ordinario Mario Trucchetti, brigadiere Alessandro Sanna, di la Sezione Operativa di la Cumpagnia di Sassari; luogotenente Daniele Antonucci, maresciallo Francesco Maria Baffigo, brigadiere Stefano Marangoni, appuntato scelto qualifica speciale Paolo De Santis, appuntato scelto qualifica speciale Gennaro Cristinziano, appuntato scelto qualifica speciale Manuela Scarpato, di l’isthazioni di Lu Palau.
(Attività realizzata col contributo della Regione Sardegna – IMPRENTAS 2025-2026. LR 22/2018)
