Otighentos annos de su presèpiu
In su 1223 sa prima rapresentatzione de su naschimentu de Deus
Sa note de Pasca de nadale de su 1223, in sa bidda de Greccio, oe in provìntzia de Rieti, Santu Frantziscu aiat realizadu una rapresentatzione bia de sa nàschida de Cristos. Naschiat in custu modu su presèpiu, chi dae issara faghet parte de sa traditziones de sas festas de nadale in su mundu catòlicu.
Unu mese in antis, su 29 de santandria, cun sa bulla Solet annuere, su Papa Onòriu III aiat aprovadu sa règula de s’òrdine frantziscanu, redatada dae su santu etotu cun sa collaboratzione de su cardinale Ugolinu de Anagni, chi diat a èssere a coa pontìfitze cun su nùmene de Gregòriu IX e chi durante su pontificadu suo diat canonizare pròpiu a Frantziscu de Assisi e in prus a Antoni de Pàdua e a Domènicu de Guzmán, fundadore de s’òrdine domenicanu.
Ocannu duncas s’afestant sos otighentos annos de s’orìgine de sa rapresentatzione sacra e de su documentu, partzidu in dòighi capìtulos, chi règulat sa vida de sas tres famìllias de sos paras frantziscanos: Osservantes, Conventuales e Caputzinos.
