StraOlbia 2023

Domìniga 7 de maju in Terranoa est in programma sa StraOlbia, manifestatzione podìstica organizada dae sa Podistica Amatori Olbia, paris cun sos sòtzios de atlètica terranoesos, su patrotzìniu de sa Comuna e de sa Confocommercio.

Ddo’ant a èssere duas garas. Una competitiva afiliada FIDAL de 8 chilòmetros e una non cumpetitiva de 4 chilòmetros. Sa cuota de iscritzione est de 12 èuros (10 pro sos grupos de 3 persones pro pagu) mentras pro esordientes e pitzocos est de 3 èuros. Ddo’at tempus pro si marcare finas a domìniga, dae sas 8 a sas 9,10 in pratza Crispi, dae in ue cumintzat e finit sa curta.

A pustis de unu riscaldamentu cun Daniele Perra, si partit a sas 9,30. Comente eventos collaterales sunt previstas esibitziones musicales, isportivas e de majorettes.

A sas 11,00 partint sas categorias giovaniles. A sas 12,00 premiatzione de sos binchidores de sa gara e finas de Scatti di StraOlbia, gara fotogràfica dedicada a sas fotografias de sas editziones passadas.