Prèmiu Nino Carrus 2025

S’assòtziu Nino Carrus de Bòrore presentat sa de oto editziones de su Prèmiu omònimu, dedicadu a atzapare propostas innovativas pro fraigare unu benidore pro sos prus giòvanos.

A chie est interessadu a partetzipare depet iscrìere unu tema, de mandare in lìnia, intro su 30 de santandria. Sas istrutziones sunt in su situ www.ninocarrus.it o si nono si podent pedire iscriende a s’indiritzu premioninocarrus@gmail.com.

Sos partetzipantes ant a èssere partzidos in duas setziones. Sa setzione A est riservada a giòvanos cun non prus de 40 annos, diplomados. Su tìtulu de su tema est “Transizione digitale e intelligenza artificiale nelle aree interne della Sardegna: idee, progetti e opportunità per promuovere uguaglianza territoriale e benessere sociale nei piccoli paesi”. Su prèmiu est de 2.500 èuros pro su primu classificadu, de 1.500 èuros, Premio Comune di Borore, pro su segundu.

Sa setzione B imbetzes est pro sos istudiantes de sas iscolas superiores de sa Sardigna. Su tema est: “Futuro senza confini: AI, nuove tencologie e digitale per rilanciare lo sviluppo in Sardegna”. Su prèmiu pro su primu classificadu est de 2.000 èuros, o in dinari o comente finantziamentu de unu caminu formativu o una vìsita ghiada in unu tzentru de chirca.

Pro sa valutatzione de sos elaborados s’assòtziu, presèdidu dae Rosanna Carboni, at a pedire s’agiudu de istitutziones universitàrias e istitutos de chirca. Su prèmiu Nino Carrus, intituladu a su professore universitàriu, cussigeri regionale e parlamentare democristianu nàschidu in Bòrore in su 1937 e mortu in Casteddu in su 2002, est finantziadu dae sa Fondazione di Sardegna e dae sa Comuna de Bòrore.

(gm)