Li morthi morthi

Mamma mea, daboi chi magnabami tutti, e la banca era ipparicciadda, no fabiddaba. Pigliaba lu teru di banca bonu, e turraba a appariccià in un pasu ririgiosu. Eu m’abbaiddaba la cara d’edda e lu chi era fendi: piglià lu piattu, appuggià lu pani, assintà e isthirrì bè lu tutzibuccu e minithrà. Nudda d’appuntiddu in banca punia. Un ritu di arresu alluziaddu soru da la luzi bascia di una lampadina minudda groga. L’ischimuzi di li passi soi e di lu chi era fendi, accumpagnabani l’occi abbasciaddi di la chiza chi ni buggaba a pizu li sintiddi ch’intindia in chissi mamenti. Noi, li criadduri di tandu, no timiami. Chissu era lu ricattu pa tziu, pa tzia, pa giaiu e giaia. Passoni chi tzi vuriani bè e chi turrabani inné noi. Calche famiria lagaba fintzamenta li purthetti aberthi di la dipensa pa assé a dipusizioni di lu morthu. La casa dubia assé alluziadda cun un bironi e chisthu, o li canderi, dubiani assé posthi i’ lu gianniri o i’ lu balchoni. Chistha luzi era una ghia chi lu morthu sighia pa giumpì in chissa casa.

Tandu erani guasi e soru li mammi a dà la pisaddia a li figliori, li babbi tz’erani a fóra a trabaglià tutta la dì. Erani chisthi mammi, sobraduttu, chi purthabani addanantzi li tradizioni di la terra nosthra. Priparabani li dotzi giusthi a sigunda di la festha, e i’ la di li morthi la pabbassina v’era sempri. Tandu fabiddabami la linga nosthra, chena varghogna, in mezu a la cultura nosthra. Ma li mudelli, chi cun fotza ani appundaraddu in chissi cori semprizi, erani li chi passaba la terivisioni e l’ischora di linga e cultura cuntraria a la nosthra: l’itariana.

Canti, fabiddendi di li Morthi morthi, fazini ancora l’accunorthu? Ca semmu? Cosa semmu abà, cussì apparizaddi in chistha massificazioni chi tz’à vintu puru cun chissu “carrasciari” cunsumisthigu di Halloween? Un machini chi in pogghi anni è ridisciddu a intrà i’ lu tzaibeddu di li pitzinni nosthri, sempri più pobari e bioddi di li tradizioni sardhi. Lu di Halloween è un gioggu muitzu chi ni bogga a pizu mosthri, diauri, zombi e isthrei. No traifiri a li pitzinni chissa ipirituariddai chi inveci si mirisciani li morthi chi abemmu auddu e chi ancora abemmu i’ lu cori. Halloween è una debiantzioni anzena ischuntriadda a la cultura di una pisaddia bona di famiria. Bastha pinsà a tutti chissi criadduri chi dizini “Dolcetto o scherzetto?”. Chistha “prigonta”, cumenti l’intindimmu abà, tandu l’intindiami soru i’ li film americani in biancu e nieddu, no è umilthai acchì chissu “scherzetto” pari propiu una “minatza” e no fazi parthi di lu ritu antiggu nosthru. Inogghi si dizi soru “Pa li Morthi morthi”.

La diffarentzia tra Halloween e li Morthi morthi è chi la cultura nosthra no ciama lu morthu cun li riti di l’iputza o althri maneri patzifari, noi andemmu in giru a priguntà dotzi, o lu chi tzi dazini. Po assé mera, nozi, meragghidogna, e althru ancora, e demmu in ciambu una prighiera pa li morthi di chissa casa. Piazeri turraddi chi so imbasciaddi chi dizini chi si debi abé ripettu di li morthi e no timilli. Innè noi, è l’ammentu di li morthi nosthri e, a lu matessi tempu, lu liammu chi si poni a nobu cun eddi. In America, ma puru in Inghilterra, si dizi, inveci, chi in chissa notti girani l’animi di l’ipiriti marigni. Una diffarentzia impurthanti.

A li tempi d’abà è ancora impurthanti purthà addanatzi chistha tradizioni acchì è un varori chi fazi parthi di li radizi nosthri, ipeziaimmenti in chist’epuca chi semmu appundaraddi da lu chi veni da fóra. Li Morthi morthi è una festha chi isisthia umbè primma chi la gesgia cattorigga dichiaresi lu dui di santandria dì di li morthi. Calche aiperthu sustheni l’origini nuragica di chisthu ritu prisenti puru i’ la tradizioni tzelthiga chi dizia chi tra la notti di lu 31 di santuaini e 1 di santandria, la notti di fini di l’isthiu in chissa cultura, lu mondu di li morthi s’accusthaba a lu di li vibi. Arreu arreu è intradda in manera forthi radizendisi fintzamenta i’ la cultura di tanti poburi di lu Mediterraneu. La gesgia, tandu, à pigliaddu cussentzia e cunsideru di chistha tradizioni antigga e à fattu a manera chi chistha festha pagana caggissi lu dui di santandria, dendiri, parò, una tziribrazioni e significaddu cristhianu.

In origini era una festha pa manni e minori, ma li manni daboi l’ani intregadda a li pitzinni acchì eddi so animeddi innutzenti. Li criadduri chi in chistha occasioni ponini in pratiggu d’andà di casa in casa cu’ la foimmura nosthra, e no cun chissa angrusassaoni, uttenini una fuimmazioni culturari impurthanti, un varori chi, in chisthu mondu di omorogaddi, promobi la passona, li pitzinni femmini e masci, i’ la crescidda d’apparthenentzia a l’identiddai sardha.

Fabritziu Dettori