A lu Cunsigliu e a lu sindaggu: “Koddare bisogna”

Un’ischritta fatta a bomburetta spray in un muru di via Coraduzza. Di Peppa Matzintrè

“Koddare bisogna”, è un’ischritta fatta a bomburetta spray in un muru di via Coraduzza in Sassari. Dubimmu fà calche osseivazioni di chistha frasi, sia da un puntu di vistha linghisthiggu chi sutziari e, agiugnimmu, isthoriggu. Primma di tuttu, cosa vo dì? Prubemmu a ivulthalla in itarianu a manera tari chi tutti possiani cumprindì lu varori umanu di chissa ischritta isthrallaranti: “Fare l’amore bisogna” (Bisogna fare l’amore), e si pudaristhia aggiugnì fintzamenta un puntu eschramatibu chi l’autori anonimu no à signaddu. “Koddare”, i’ lu tempu, à pigliaddu un varori tzerraggu e ibuccaddu, pigliedi un cuntzettu di fà l’amori, ma chena amori. Cun chissa paraura pari chi si voglia allumma lu significaddu di l’attu sessuari, ipeziaimmenti candu, mancarri, eddu o edda, so arrabanendi. Calchunu dizi chi Monte d’Accoddi, vo dì propiu “Lu Monti indì si codda”. Insomma una frasi piena di amori chissa di via Coraduzza, chi cumbidda a la procreazioni di l’ipezia umana. Ammenta tantu chissa di l’anni sessanta di “Fate l’amore e no la guerra!”. Ma acchì la K? Tzerthu a lu primma assibisthu pari una frasi sardhu-itariana, ma si ‘sthemmu attenti “bisogna” si tratta puru in sassaresu, cusichè pudimmu cuinfimmà chi la frasi è autenticamenti sardha!  E chisthu è un puntu a fabori di l’ischritta, e no anda tandu crassificadda che un’ischritta iscidda mari, un poggu in sardhu, e un poggu in itarianu. Chisthu sia ciaru! Ma acchì chissa ocrusiba verari sordha, lu K? È chistu chi lassa tutti transiddi, tantu chi pa anni in tanti si l’ani priguntaddu. Abisumeu, e dimmu soru “abisumeu”, l’anonimu ischrittori à vuruddu dà a lu fonema un grafema curripundenti a un C chi anda liggidda cun un sonu più forthi, tandu una K, e chi si po sonorizà in G, ma soru mancarri prima di l’arthicuru deteiminatibu, esempiu di prununtzia: Li guddaddi. Chena l’arthicuru parò, e cu’ la pripusizioni A, chi si poni primma di una prigonta, ese.: A v’andemmu a cuddà?, tz’abizemmu subiddu chi chissa ocrusiba no ciamba. Dimmu tandu chi l’autori di siguru pudia trattà una C inveci di lu K, acchì lu k si tratta soru cu’ la i, e cu’ la e: Ki, Ke, ma, cumenti abemmu ‘ià dittu, s’è vuruddu dà, abesumeu, una fotza in più a l’atzioni di cuddà propiu cun chissa lettara forthi. È di priguntassi si la “e” di Koddare, è un itarianismu, o cosa, o si è in sardhu, acchì l’infiniddu in sassaresu è “”cuddà”.  In dugna modu la foimma grammaticari è sardha, acchì a primma la cosa più impurthanti, “Koddare”, è ischritta a l’iscumnetzu. Pinsemmu si saristhia ischumintzadda cun “Bisogna”, “Bisogna koddare”, cantu abaristhia sunaddu mari! Pa furthuna l’obara è di un sardhofonu.

Ma ca fini à fattu chissa ischritta? Nisciunu è giuntu a sabellu, e no so pogghi li sassaresi chi si lu so priguntendi. Abemmu lu suipettu chi mancu la sovrintendentzia l’aggia tuteradda. Piccaddu, acchì pudia assé un’attrazioni turisthigga impurthanti. Pudia assé utiri pa la didatigga pa cumprindì un fenomenu sutziari e linghisthiggu di varorizà. Era ‘sthaddu beddu una bedda caminadda cun attoppi chi pudiani parthì da la Funtana di Ruseddu pa arribì propiu in Via Coraduzza a mirà chissa ischritta. Ma si sa, li sassaresi no cumprendini lu bè chi ani, daboi di lu Castheddu di lu Pianu, Li Mura, abà la marasorthi à tuccaddu, a doru mannu, puru chissa ischritta. Noi, mancumari, abemmu fattu a tempu a candidalla i’ lu podiu di lu patrimoniu mundiari di l’ammenti di li sassaresi. Trancuilli! L’ischritta isisthi ancora, immurtharadda da Google Maps puru, ma à nitzissiddai d’assé resthauradda in tempi lesthri. Si no vi pensa lu condominiu, chi vi ponghia manu lu Comuni! Ma l’isthituzioni, ‘ià si sa, chi si n’affuttini e pensani a li macchini inveci di li cosi seri. Accò tandu la ciamadda a li Cunsigliu comunari e a lu Sindaggu nobi chi so accosthu a pusassi a amministhrà lu disthinu di li sassaresi, e lu patrimoniu monumentari di la tziddai: Resthaureddi chissa ischritta!  

Peppa Matzintrè

Articoli Correlati

Lascia un commento

Pulsante per tornare all'inizio