Piccapidreri in festha pa’ la patrona Madonna della Salute

Dumenigga passadda lu Gremiu di li Piccapidreri à ziribraddu la so’ patrona, la Madonna della Salute. La festha manna di la cunfraria puru chisth’annu l’ani fatta i’ la gesgia di Santu Antoni, ciamadda puru di li Seivvi di Maria. La casa di li Candareri, Santa Maria di Belé, è sempri tancadda pa’ li trabagli a la navata zentrari e no vi sì signari chi sarà abertha pa’ la Faradda chi veni.

A manzanu, a la fini di la messa ziribradda da padri Danilo Pischedda, v’è isthaddu lu ritu di l’intregu, cu’ lu passaggiu di la bandera manna da lu paraiu uscenti Gavino Sechi a lu paraiu nobu Giovanni Luigi Sechi. Lu Coru di Florinas à cantaddu li canti di la tradizioni sacra sardha, cumenti fazi da più di vint’anni. Lu seivviziu musicari era inveci di lu Corpo Bandistico Luigi Canepa. Erani prisenti lu sindagu Giuseppe Mascia, l’assessori regionari Antonio Piu e la cunsigliera regionari Francesca Masala, umpari a lu presidenti di l’Intergremio Fabio Madau.

A sera, la pruzissioni cu’ la parthizipazioni di tutti li cunfrarii à fattu tappa i’ l’ippidari ziviri, a lu Policlinico e a lu parazzu maternu-infantiri di l’Aou pa’ prigà cu’ lu simuracru di la Madonna della Salute. À assintaddu lu curtheggiu padri Saivadori Sanna di lu cunventu franzischanu di Santa Maria di Belé.

La Gremiu di li Piccapiddreri à puru una compatrona: è Sant’Anna, chi abia in passaddu una cappella, abà no più in pedi. Inogghi v’era la sedi di la cunfraria, primma chi abussia la cappella a Santa Maria da lu 1876. Li Piccapidreri cumprendini li maesthranzi di li scalpellini, minatori e tagliatori di predda. Faziani parthi di l’antigga Cunfraria di la Madonna di l’Agniri (in caddaranu ciamadda Confraria di Nuestra Segnora dels Angels), umpari a Fabbriggamuri e Masthri d’ascia. Lu Gremiu di li Piccapidreri è naddu parò i’ lu 1856, ma no erani affaccu a li Fabbriggamuri da umbé d’anni. I’ lu prinzipiu, candu ancora no erani una cunfraria di mesthieri, la patrona era soru Sant’Anna. Ma i’ lu 1855 l’abitanti di Sassari fusini dicimaggi da lu corera. Da chissu mamentu la patrona fu la Madonna della Salute, e Sant’Anna divintisi la sigunda protettrici. Lu Gremiu fa parthi di la Faradda da lu 1955. Lu curori è lu biaitu damaschaddu, comuni a tutti l’althri gremi chi faziani parthi di la Confraria di Nuestra Segnora dels Angels).

(luca foddai)

(Attività realizzata col contributo della Regione Sardegna – IMPRENTAS 2025-2026. LR 22/2018)