Premiu di poesia Culléziu, la di vintinobi edizioni

Sabaddu 30 di maggiu, a sera, i’ l’aura magna di l’Unibessiddai di Sassari, in Culléziu, ani fattu la zirimonia di premiazioni di la di vintinobi edizioni di lu premiu di poesia Culléziu, fisthiggiaddu pròpiu i’ lu loggu chi li dazi l’innommu.

V’erani tre sezzioni: una pa’ lu sassaresu, una pa’ lu sardhu e l’althri linghi di Sardhigna e una pa’ l’itarianu.

I’ la sezzioni sassaresa à vintu Pier Giuseppe Branca, cund un cumpunimentu intituraddu Riu Gàbaru. Lu sigundu premiu è andaddu sempri a Pier Giuseppe Branca cun Canzona di Giuni e lu di tre a Mario Olivieri cu’ Li piggi di lu cori.

I’ la sezzioni dedicadda a l’althri linghi di Sardhigna à vintu Lillus arrùbius, di Teresa Piredda, di Escolca. Lu segundu premiu l’ani assignaddu a Paghe di Sebastiano, cunnisciddu cumenti Eliano, Cau, di Neoneli, e lu di tre a Vittoria Anna Perotto, di L’Ariera, cu’ la poesia Un Horitzont Diferent.

La sezzioni in linga itariana l’à vinta Vito Sorrenti, cun Soffi di vita. Sigundu premiu a Alessandra Cossu, cun Ad un passo da me e lu di tre a Sebastiano Cau cun Nell’aria che affina.

Faziani parthi di la giuria Giovanni Fiori, presidenti, Stefano Arru, Mario Marras, Pietro Garau, Domitilla Mannu e Antonello Bazzu, segretariu cun dirittu di votu.

Lu premiu Culléziu è orghanizaddu da lu 1977 da l’assozziazioni culturari omonima, nadda propiu in Culléziu, da un’iniziatiba di Franzischinu Paulesu.

Riseivaddu tandu soru a lu sassaresu, duranti l’anni à abberthu la parthezzipazioni a l’althri linghi puru. Lu presidenti di l’assozziazioni è Gianni Paulesu, fraddeddu di Franzischinu. Lu direttibu è cumposthu puru da Salvatore Solinas, vicepresidenti, Antonio Casu, segretariu, Antoniu Luzzu, casceri, Tonino Cazzari, reppunsabiri cultura, Sandro Cherchi, reppunsabiri cambusa, e Pippo Piseddu, reppunsabiri beni mobiri.

(gianni muroni)