Prèmiu Màuru Deledda, sos binchidores
S'est concruida s'editzione 2023 de su cuncursu literàriu in sardu
Su comitadu organizadore de su prèmiu de narrativa in sardu intituladu a Màuru Deledda, fundadore in su 1979 de su prèmiu Casteddu de sa Fae de Pasada, at fatu a connòschere su resurtadu de su cuncursu pro su 2023.
In sa setzione ùnica, Romanzu in Limba Sarda, ant bintu Badde tèrrina, de Italo Deledda e Bratzos pro carvone, de Franca Pirisi.
Sas òperas, cunforma a su bandu, ant a èssere publicadas dae Papiros cun un’adatamentu a s’istandard ortogràficu. S’editore at a tènnere sos deretos pro tres annos dae sa publicatzione. A sos binchidores andant 30 còpias de su libru. Sos romanzos ant a èssere presentados in Nùgoro e Tàtari, logu de residèntzia de sos duos iscritores.
Italo Deledda est nàschidu in Pasada. Ex professore de italianu in sas superiores, at giai publicadu unu romanzu in italianu. Franca Pirisi, nàschida in Turalva, est issa puru ex professora de materias literàrias in sas superiores e at publicadu unu romanzu in italianu e contos in italianu e sardu.
Su comitadu de su prèmiu Màuru Deledda est cumpostu dae sos familiares de Deledda, dae sa Sotziedade pro sa Limba Sarda e dae Papiros Editziones.
Sa giuria fiat cumposta dae: Duilio Caocci, professore de literadura sarda in s’Universidade de Casteddu; Elena Casu e Gigi Stochino, professores de matèrias literàrias; Diegu Corraine, istudiosu de sardu; Clara Farina, artista e ex professora.
