Son Rompe Pera, sa cùmbia messicana in Sardigna

In su teatru naturale de Portu Ferru, Tàtari, su 12 de austu sos messicanos Son Rompe Pera ant fatu a connòschere a su pùblicu sardu sa mùsica issoro.

Su grupu de Naucalpan formadu dae sos tres frades Gama, Jesús Ángel “Kacho” (marimba), Alan “Mongo” (marimba e chiterra elètrica), Alfredo “Murfy” (percussiones) e dae Raúl Albarrán (bassu) e Ricardo “Ritchie” López (bateria), partit dae sa cùmbia, genia de mùsica colombiana populare meda in Mèssicu, e dd’ammisturat cun sonos punk, cun un’operatzione sìmile a sa chi aiant fatu sos Pogues in sos annos ‘80 cun sa musica irlandesa.

Su cuntzertu est cumintzadu a sas deghe e est andadu a in antis pro un’ora e mesu cun bis e ter rechestos dae su pùblicu. Ant sonadu petzos presentes in sos duos album publicados finas a como, Batuco e Chimborazo, e in prus clàssicos de sa cùmbia che a Lejanía, de su colombianu Lisandro Meza e Cariñito de sos peruvianos Los Hijos del sol.

S’esibitzione de su cumplessu messicanu, un’èsitu mannu de presèntzias e gradimentu, introduida dae sa mùsica de Frantziscu Medda “Arrogalla”, chi at finas serradu su sero, fiat s’ùrtimu apuntamentu de su Festival Abbabula de ocannu, organizadu, che a semper, dae sa cooperativa Le Ragazze Terribili.

(gianni muroni)