Sas paràulas de su Papa a sos giornalistas

Su 12 de maju su Papa Leone XIV at tentu sa prima udièntzia pùblica cun su mundu de sa comunicatzione in s’Àula Nervi, in Vaticanu.

Su Pontìfitze at faeddadu pro una deghina de minutos. At cumintzadu in inglesu e a coa at sighidu in italianu.

A pustis de àere torradu gràtzias pro su traballu fatu dae sos giornalistas at ammentadu sos faeddos pronuntziados dae Cristos in s’Allega de su Monte: Biados sos operadores de paghe.

Sos giornalistas puru, at agiuntu su Papa, podent èssere operadores de paghe, informende in manera curreta e non fatziosa.

«Su modu chi comunicamus est de importàntzia fundamentale. Depimus nàrrere chi nono a sa gherra de sas paràulas, de sas immàgines».

Poscas at riservadu una cantas paràulas a sos giornalistas chi sunt in presone pro su traballu issoro.

In una sotziedade un’informatzione lìbera est ligada a sa libertade etotu ca «sos pòpulos informados ebbia podent fàghere sèberos lìberos».

E custu ca «non podent esìstere una comunicatzione e unu giornalismu foras dae su tempus e dae s’istòria».

De su restu su ruolu de sa comunicatzione e s’influèntzia bona o mala chi podet tènnere in sa sotziedade est istadu antitzipadu dae sas paràulas de Santu Austinu: Bivimus bene e sos tempos ant a èssere bonos.

Su Papa at fatu finas unu riferimentu a s’inteligèntzia artifitziale chi, cun su potentziale suo, tenet bisòngiu de una responsabilidade manna in su modu de dd’usare.

A sa fine de s’udièntzia Leone XIV at dadu sa beneditzione in latinu a sos presentes.

Giai annos a como su chi fiat issara su padre Prevost si fiat ocupadu de su tema de sa comunicatzione in un’interventu in su Sìnodu de sos pìscamos pro s’Evangelizatzione Noa.

Faeddende cun sos giornalistas de Catholic News Service aiat naradu ca «si controllas sos mèdios de comunicatzione controllas, nessi in parte, su modu chi sa gente pensat».

(gianni muroni)