Su Pàliu de Mesaustu est andadu a sa Contrada de s’Oca, cun su caddu Zio Frac, chi at bintu sena de cadderi. A pustis de una mossa longa, che a sa de trìulas, pro sa presèntzia de Pantera e Aquila, rivales, una acanta de s’àtera, sa Giraffa cun Tittia est partida dereta in prima positzione ma su caddu, Abbasentesa, at iscutu a su muru in su primu giru cajonende sa ruta finas de su cadderi de s’Oca, su sindiesu Carlo Sanna, mutidu Brigante.
Sa Pantera issara, cun Scompiglio, pariat aviada a sa vitòria ma est ruta issa puru.
A cuddu puntu su caddu de s’Oca s’est atzapadu primu. Sa Torre pròpiu acanta de su traguardu at chircadu de nche ddu colare ma su cadderi, su bortigalesu Giosuè Carboni, in arte Carburo, est rutu issu puru. Pro s’Oca est sa de de sessantasès vitòria. Siat pro su caddu Zio Frac siat pro Carlo Sanna sa de duas.
(gm)
