I’ L’Isthintini ippiaggi “pet friendly” a Punta d’Elici e Pazzona
Poni intrà li cani ischritti all’Anagrafe Canina, chi so microchippaddi e in regura cu’ li vaccinazioni
L’amministhrazioni comunari di L’Isthintini anda i’ la direzioni di un turismu più susthenibiri e chi poni afficcu a li nizessidai di li zittadini. Lu sindagu Rita Limbania Vallebella à fimmaddu l’ordhinanzia chi introduzi dui parthi di ippiaggia pet friendly, didicaddi di lu tuttu a l’amigghi più fideri di li passoni, li cani. L’ippiaggi so a Punta d’Elici e Pazzona. Un’iniziatiba chi à auddu l’apprubazioni piena di lu Dipartimento di Prevenzione della Asl sassaresa (Servizi Randagismo e Salute/Ambiente) e di la Capitaneria di Porto – Guardia Costiera di Porto Torres.
Cu’ la soruzioni d’ippiaggia libbara è pussibiri varorizzà l’ambienti garantendi l’autonomia a li padroni. So arei chena attrezzaddura (letti o ombrelloni): dunca dugnonu po fa cumenti vo cu’ lu massimu confort soiu e di l’amiggu animari.
A Punta d’Elici è isthadda isciubaradda una parthi di 250 metri dananzi a lu mari pa’ 8 metri di profondiddai. Lu loggu è individuaddu grazie a cartheddoni che indicani lu prinzipiu e la fini. Vi so puru punti ipizzifigghi pa’ l’algha. Cussì si tutera la biddezia naturari.
A Pazzona v’è un’area di 100 metri liniari (800 quadraddi) cu’ una passerella noba in legnu, utiri a garantì un accessu faziri e siguru a li passoni disabiri chi entrani umpari a lu cani soiu.
«Chistha nobiddai è lu compimentu di una prummissa d’impegnu zivicu pigliaddu cu’ la comuniddai», dizi Rita Limbania Vallebella, sindagu di L’Isthintini. «L’obiettibu è puru chissu di offrì a tutti canti seivvizi chi tuterani lu decoru di l’ippiaggi e, a lu mattessi tempu, accugliendi famirii e visitaddori chi ani in cabbu la vuruntai di fa’ li vacanzi umpari a l’animari soiu. Un isciobaru di zividdai, incrusioni e attrattividdaià turisthigga erebadda».
Si po intrà i’ l’area pet friendly cu’ uniguanti dizisioni, da chintari a l’incrinadda: l’intradda è riseivadda a li cani ischritti all’Anagrafe Canina, chi so microchippaddi e in regura cu’ li vaccinazioni. Debini assè puru cu’ lu guinzagliu i’ li percorsi pa’ entrà, cu’ la museruola affaccu e cu’ 10 metri tra li pusizioni i’ l’ipiaggia. È prischrizza la cura di una idratazioni e di isthà sottu a l’ombrelloni, pigliendi li deiezioni di lu cani soiu e dabboi impriendi li contenitori già insthalladdi i’ l’arei pa’ cunferì l’algha.
(luca foddai)
(Attività realizzata col contributo della Regione Sardegna – IMPRENTAS 2025-2026. LR 22/2018)
