Ogiastra, machinàrios noos pro Anestesia
Sas guàrdias mèigas ant a abèrrere pro totu sa fine de chida in 9 biddas
Sunt arribados a s’ispidale de Lanusè tres bentuladores mecànicos pro su repartu de Anestesia. Duos sunt giai in funtzione.
Custos machinàrios, a diferèntzia de sos betzos, sunt totu eletrònicos e cunsiderados prus pretzisos.
A presse at a arribare ateruna Tac pro su repartu de Radiologia.
Semper pro su pertocat s’Ogiastra pro custa fine de chida sas guàrdias mèigas ant a funtzionare a tempus prenu in 9 biddas. Dae sas oto de sero de oe 13 de ghennàrgiu a sas 6 de mangianu de lunis 16 sunt operativos sos turnos in Tortolì, Irbono, Barì, Baunei, Jersu, Tertenia, Perdasdefogu, Gàiru e Seui.
In Talana imbetzes sa guàrdia mèiga est aberta dae sas 8 de sero de su 13 a sas 8 de sero de su 15.
In Biddamanna dae sas 8 de sero de su 13 a sas 8 de mangianu de su 14; dae sas 8 de mangianu de su 15 a sas 8 de mangianu de su 16 e in prus at a abèrrere su 17, su, 20 e su 27 de ghennàrgiu, semper dae sas 8 de mangianu a sas 2 de sero.
