Lu cotzuru di l’obu, lu rigaru di Pascha pa li pitzinni

Lu cotzuru di l’obu è un pani chi no si cunnosci guasi più a Sassari. Ipariddu da la tradizioni di Pascha d’abriri, è assibisthaddu soru che erementu di la cultura sardha disthaccadda da Sassari. Un pani antiggu chi inveci si fazia in chistha tziddai puru, e chi li passoni di eddai manna ammentani cun sintiddu.

Lu cotzuru no era soru lu pani, era un cantaru di vidda ischumparthidda umpari a la linga chi li femmini sassaresi fabiddabbani ischurrenti cun chissu lessiggu propiamenti di settori: suigghì, bichiggià, carià. Era un mondu chi abà immaginemmu faddaddu, e li faddi li femmini nosthri chi lu priparabani. Si puru lu cotzuru no è una pecuriariddai sardha, tzi so, infatti, varianti di chisthu pani fora puru di l’Isura nosthra, chisthu è nosthru acchì inogghi à cori e anima.

Li cosi ciambani cu’ lu tempu e in chistha tzibilthai cunsumisthigga chi ivoltha li tradizioni in forcrori mori fintzamenta la cultura e la sacrariddai di lu pani. Li vecci contani chi si unu acciappaba pani in carrera ni l’accuglia, lu basciaba, e si lu magnaba.

Lu pani in banca era simburu e, a lu matessi tempu, indizi di vidda e bona sorthi. Si mancaba vuria dì chi avveru d’assé caggiuddi in pobarthai chena proiperiddai.

L’obu, lu di lu cotzuru, chi era lu disizu di dugna criaddura di tandu, abà è lu rigaru di ciccuratti di frabigga multinatziunari chi dugna pitzinnu e pitzinna po abé, cumenti cumanda la prubritziddai, a dipusizioni in cassisia dì in tutti li butrei indì andemmu a fà l’ipesa.  

Lu cotzuru abà è “ischumpassaddu”, che la festha di li Morthi Morthi cun Halloween, e si l’abri v’è soru la poipa di lu pani e drentu a l’obu sempri e soru lu toraru: no v’è la sorpresa.

In chisthu pani, chi pudia piglià la foimma d’agnoni, di curomba, di pesciu, di fiori, e cussì althri foimmi, si punia un obu (calche voltha era a tosthu) i’ lu cummassu, e si fazia cuzì i’ lu forru a legna. Erani dì di festha chissi. Pa tutta la chedda si priparabani fintzamenta li dotzi, ma lu cotzuru era propiamenti un rigaru bonu pa li pitzinni in chissa dì santa.

Pa furthuna in Sassari v’è calche assutziazioni chi no vo pirdhì chissa tradizioni e la portha addanantzi, ma addorumannu lu cotzuru no è più i’ la cultura vibà di li sassaresi.

Calche docenti paghisthu l’è fintzamenta fendi cunniscì a l’ischurani. Accò, tandu, un trabagliu di calche annu adabà di li pitzinni di l’ischora erementari di Santu Giuseppi in Sassari:

Lu cotzuru di l’obu

Lu cotzuru di l’obu è assai parthicurari
piglia umbè di foimmi candu lu femmu umpari.
Puppia, pizoni, agnoni, fiori e,
si ti piazi, puru a foimma di cori.
A Pascha a li pitzinni era disthinaddu.
Si lu magnabani a immuzu
e cuntenti li fazia.
Acchì era simburu di vidda
proiperiddai e alligria.
Pa priparallu vi vo:
farina, obi, sari finu, e un poggu di maddrigga.
Trabagliemmu tuttu lu cummmassu cumenti si tocca
e cu’ l’obu a tosthu innantu, lu mudillemmu a l’arthi nosthra.
Vi punimmu tuttu l’appentu a ricamallu
e a dalli biddezia e puisia.
Infurremmu ¾ d’ora pa cuzillu e cussì sia.

PRIPARAZIONI DI LU COTZURU DI L’OBU

La ritzetta. La cosa chi fazi piazeri è la gana di tanta genti di fà turrà nosthra chissa cultura e di ricuperalla pa prupunilla torra a li pitzinni. Tandu si è pa eddi chi è disthinaddu chisthu pani, femmuzi aggiuddà da eddi matessi. In chistha manera abarà a assé una tradizioni parthecipadda e più forthi. Femmuru, tandu, chisthu cotzuru di l’obu.

La, o lu, chi lu priparaba, si puru cu’ la cussentzia chi era un trabagliu effimeru, vi punia tuttu lu cori a fallu, e lu chi n’iscia era arthi. Saristhia beddu a priparallu cu’ li criadduri e cu’ li parauri in sassaresu acchì digussì si leani a pari linga, emutzioni e tradizioni: una foimmura bona pa interiorizà megliu l’idioma chi semmu impriendi. Chisthu abarà a assé un segnu d’alligria, di vidda famiriari, d’ischora, e pruperiddai di la cultura sardha-sassaresa. Pa la ritzetta turremmu gratzie a tzia Frantzicha Canu.

Lu chi vi vo pa la priparazioni:
– 1 kg di simura fina
– 30 g di maddrigga
– eba
– obi
– sari finu

Piglià la maddrigga e ammudigalla i’ l’eba tebia fintz’a isciuglilla. La simura anda ammuntunadda e cu’ li mani l’abrimmu fendi un isthuvuru. Punimmuzi l’immisciu di chiss’eba cu’ la maddrigga e agiugnimmu un vinti grammi di sari. Tandu isthirrì i’ la mesa e ischumintzà a carià e a bichiggià lu cummassu. Aggiugnì dugna tantu eba tebia. Lu cummassu pa assé bonu no deb’assé troppu moddu, ma prasthiggu e chena murrutzuri.

Dassà pasà a drentu a un isthegliu, chi po assé fintza lu cuncheddu, cuvacaddu cu’ un teru. Candu lu cummassu à ammaddriggaddu bè, trabagliallu ancora e, tandu, punì l’obu – chisthu o si fazi a tosthu primma, oppuru si poni crudu isthampendiru cu’ un’auza – , i’ la foimma chi abemmu fattu. Abà, si no è isthaddu riarizaddu primma, mudillemmu la foimma a l’arthi nosthra. Dassà pasà un paggiu ori. Infurremmu e femmu cuzì a 250° pa tre cuarthi d’ora.

Fabritziu Dettori