Casteddu, manifestatziones pro Sa Die de sa Sardigna
Dae su 26 a su 28 mùsica, teatru, pintura e àteru in carrera
Casteddu, su 26, 27 e 28 de abrile, at a èssere teatru de manifestatziones pro Sa Die de sa Sardigna.
Si cumintzat sàbadu 26 a sas 3 de sero cun sa mustra artìstica estemporànea Artistas in s’arruga, in cursu Vittorio Emanuele II. A sas 16,30, cun partèntzia dae pratza Aquilino Cannas, ddo’at a àere una passigiada in sas rastas de “sa di de s’aciapa”, intitulada Sa Sarda Rivolutzione.
A sas 17.00 Sonadores, mùsica in carrera in cursu Vittorio Emanuele II. A sas 17,30 Contos, paristòrias pro pipios a incuru de sa libreria Tuttestorie in bia V.E. Orlando 4.
A sas 18,30 Nara Cìxiri, una performance de Andra Murru dae su passigeri, in pratza Yenne. Su note, a sas 22,00, si finit in mùsica cun unu dj set cun Brew Bay in cursu Vittorio Emanuele II 151.
Domìniga 27 a sas 19,30 ant a fàghere una Flacada, passigiada cun intortzas allutas, in cursu Vittorio Emanuele II, pratza Yenne, bia Manno e pratza Costituzione.
S’ùrtimu apuntamentu de sa die est a sas 20,00, cun Procurade ‘e moderare, unu flashmob in pratza Costituzione, Bastione Saint Remy.
In fines, su 28, sa die de sa festa, in Su Cramu, a sas 20,00, a incuru de Figli d’arte Medas, si serrant sas tzelebratziones cun Afestende sa Die de sa Sardigna. In programma: Innu Sardu, esibitzione de Andrea Porcu; premiatzione de Aristas in s’arruga; Sonade a cantade bois, cuntzertu cun Claudia Aru, Franca Masu e Andrea Andrillo.
(gm)
