La curunizazioni energetigga che l’oru di Furtei

Emmu, pudiami abizatzinni primma. Farà in piatza a prutisthà ‘ià da vint’anni adabà, ma in curunia li cosi li fazini a manera tari chi la genti no si n’abizia sùbiddu. In Curunia, arreu arreu, ti ni boggani la linga fendiddi cridì chi è ischumpassadda (superadda) chi è megliu la linga di lu prugressu, di la moderniddai, chissa cioè di ca t’è duminendi. Ti cunvintzini chi è la linga duminanti chissa tzibiri e di l’opurthuniddai, di l’eregantzia. Lu curunizaddu piglia la fatza cussentzia chi no à linga, chi la soia è un diarettu, di gradu inferiori. L’isthoria, la chi conta, è chissa chi brabi e “colti docenti” dazini imparu a ischora. Lu chi rimani a lu duminaddu è la manifesthazioni di lu soiu i’ li sagri paesani indì, la tzirchusthantzia inogghi lu pimmitti, po ipricà la cultura e lu fabeddu soi in cantzoni, i’ li maneri di cuzì, o in althri cosi. Stop! Accabbaddu l’eventu folcloristhiggu, fini la libara incusapeburi dimensioni soia, e si torra a la “normariddai” di passona chi si medesima i’ la nazioni duminanti punendi a un’ara la linga soia pa trattà la chi t’ani dittu migliori. Bona è la linga di lu duminadori, bona è la cultura e l’isthoria di lu duminadori, boni so li parauri ereganti e sabuddi di lu duminadori… A la fini tuttu lu chi passa eddu dibenta bonu i’ lu cabbu di ca pa inginnirazioni à subìddu la curunizazioni fintza i’ l’anima. Un poburu dibenta genti chi perdhi cassisia vuruntai, sobraduttu candu li matessi raprisintanti puritici so la longa manus di la puritigga apunduradora (prevaricadora). Accò, tandu, chi a chisthu poburu chena più cussentzia di lu chi è, chena più intenti comuni, po assé fattu di tuttu, puru l’impussibiri a ischumbattu, (rispetto a), a un poburu chi no è curunizaddu. Mario Draghi, mancu chi fussia Deu in terra, à ditzisu. No, l’Itaria, l’Isthaddu itarianu, i’ li passoni di Draghi, o di Gilberto Picheto Fratin, ma sempri l’Isthaddu Itarianu, chi assibistha (à percetzioni) da sempri la Sardhigna che curunia chena poburu e chena risisthentzia, à ditzisu. E paghisthu chi ritengu impurthanti lu passaggiu da A fora sas palas de sa Sardigna a A fora s’Italia de sa Sardigna chi ani tzicchirriaddu li manifesthanti a lu porthu di Oristhanu candu cun varori ani risisthiddu cantu pudiani a l’attaccu di poritzia e carabineri.

Tuttu, cu’ li cundizioni di curunizazioni po passà sobra a lu cabbu di li sardhi, e digussì, infatti, è sutzidendi. Poni piglià la terra candu voni eddi, acchì eddi, li curunizadori, cumandani in chistha terra chi a buglia si ciamma “autonoma”, pa impiantà pari eorigghi, pannelli sorari, e althru. In una terra indì s’è prubadda e daboi s’è mantesa la curunizazioni pisanti di li basi miritari chena abé nisciuna reazioni (Pratobello a parthi chi ancora fazi esenpiu) da lu poburu sardhu, l’Isthaddu Itarianu è siguru chi l’area curuniari ciamadda Sardhigna po assé ivulthadda a piazeri soiu. A li sardhi abarà a abbasthà calche loggu di trabagliu pa mantinilli pasiddi. So ‘sthaddi rigisthraddi morthi tzibiri a causa di li basi miritari, ma la ripostha di calchunu di li chi da chissa occupazioni ani un isthipendiu lu commentu è isthaddu: “Di una cosa dubimmu murì”. La matessi cosa è sutzidendi cu’ l’occupazioni e invasioni di la Sardhigna cu’ li pari eorigghi e pannelli sorari. V’è genti, troppa, chi accusa li chi no voni chissi brutturi di no vuré lu prugressu, chi l’energia la trattemmu, chi la Sardhigna, e turremmu a la rasgioni di l’ischumentzu, debi assé moderna. In una terra indì la cultura dazi un impurthantzia manna a lu lingaggiu di l’occi è una cosa grabi. L’ucciadda surriddi, brea, l’ucciadda t’avverthi, l’ucciadda a ischurriaddura traimmitti l’inamisthai. L’ucciadda po fà tutta una rasgioni cumpridda, ti po amà, isthimà. Ma l’occi debini vidé, acchì n’abemmu la nitzissiddai pa assé umani. Vidé lu paesaggiu di la terra nosthra, gesgi antigghi, nuraghi, baddi e muntiggi, aiburi, ani fuimmaddu i’ li securi lu caratteri natziunari d’assé sardhi. Pa li sardhi, pa noi sardhi, infatti, casa nosthra no è soru indì ‘sthemmu, ma tutta la Sardhigna. Pianà, o soru arruinà, una petzu di chistha terra nosthra, vo dì ammatzà umpari a l’ambienti, lu sensu d’assé sardhi.

Fabeddani pa ingraugliatzi (pigliatzi pa lu curu) chi voni una Sardhigna green.

Si da una parthi la Sardhigna è la “regioni” itariana cu’ la più altha emissioni di CO2, da l’althra è propiu la Sardhigna chi gratzia a lu litu (buschu) e foresthi soi, à lu più althu assuibimentu di CO2. Nisciunu è contru a lu chi fazi bè a la Sardhigna, e tutti voni una pruduzioni di energia netta pa l’Isura, ma chisthu no vo dì chi la pruduzioni debi assé tari pa lu fabisognu di 50-60 mirioni di passoni, acchì chisthu signifiggà brusgià aiburi, ambienti, e pesaggiu, cun un foggu dibessu. Si la fotziani eddi a casa d’eddi la “transitzioni energetigga”! Lu poburu sardhu è assibisthendi chi l’isthaddu itarianu, umpari a l’isthituzioni soia, chissa regionari, l’è appundarendi pa dà energia a chissi 50-60 mirioni d’itariani funtumaddi ch’isthazini puru in chissi “regioni ricche”. L’energia pruduzidda cu’ lu cumbusthibiri fossiri è ‘ià in surplus chi è esportaddu in Itaria. Acchì tandu, no arriggì chissa pruduzioni in più visthu chi è avvirinendi l’aria?!

La prisidenti di la Regioni Alessandra Todde, ‘ià vice Ministhru di l’iviruppu economiggu atzadda a lu gubennu cu’ li voti di li lumbardhi (Circoscrizione Lombardia 2), in chistha cumbatta s’è dimusthradda cuntinuadora di la puritigga curuniari. L’althri primma d’edda, si ciaru, lu matessi. La signora Todde è isthadda luntana, indifarenti, si no cuntraria, a la lotta di tutti chissi passoni chi ani tzirchaddu in dugna modu di impidì lu sagrasthu chi da lu porthu di Oristhanu era in viaggiu pa Villacidro. Abemmu visthu tutti cumenti li carabineri, li puritzotti, ipigniani cun atza fintzamenta passoni disabiri e veccitti femmini e masci chi cun amori mannu erani difindendi la terra nosthra. Nudda, la Todde mudda! Calchunu chi ancora la difendi dizi chi umbè di sardhi no s’ani nudda di la cultura di ammisthrà. È chisthu chi dazi futta… In Sardhigna abemmu bisognu in chisthu mamentu di un’althra cultura, chissa di la disobedientzia tzibiri, chissa di liberazioni ‘ià postha in campu, cumenti abemmu dittu, a Pratobello. Tradiddi s’intendini li chi l’ani vutadda e chi i’ li social lu dizini, francu li chi timmini d’assé ischunfissaddi. La Todde parò no à tradiddu, è isthadda coerenti a lu prugramma eretturari di “Sardegna, è ora!”. E da lu “Programma politico di coalizione per Alessandra Todde Presidente” si leggi: “Asse programmatico 8: Transizione energetica. La transizione energetica è un processo che avrà un significativo impatto sul sistema socioeconomico delle comunità sarde. Gli effetti dipenderanno da come le strategie energetiche verranno adattate al contesto ambientale, paesaggistico ed industriale, e da come verranno armonizzate con le condizioni sociali delle comunità interessate, in una prospettiva di sviluppo integrato e sostenibile. L’ambito di azione deve essere libero dalla ricerca del consenso immediato, da ideologie non in linea con l’evoluzione scientifica e tecnologica e da approcci populisti e demagogici”. Grassetu nosthru. E no v’è althru d’aggiugnì. Era, e è, tuttu freddamenti pribisthu. Li prutesthi a Oristhanu, chissi di Selargis contru a la Tyrrhenian Link chi s’è pigliendi la terra produttiba di li sardhi pa lagà iviaddi (disoccupaddi) e “terra brusgiadda”, era ‘ià tuttu posthu in contu. Accò acchì è ‘sthadda mudda.

La soruzioni autocuruniari di l’ “Aree idonee” di la Regioni. Cosa vo dì? Vo dì chi no abarà a assé l’Isthaddu ma la Regioni a pigliassi la ripunsabiriddai di ditzidì indì impiantà isthirriddi manni di millari e millari di ettari di pannelli fotovoltaici, althrettanti di pari eorigghi a terra, e digussì a mari, pa giumpì a li 6,2 Gigawatt chi l’Itaria vo da la Sardhigna. Una situazioni chi fazi umbè comodu a lu curuniarismu. Si no si ciamba puritigga, lu sagrasthu, lu dannu eternu, abarà a fassi. E lu peggiu è lu chi no si vedi, cumenti lu basamentu cicropicu cun 3500 tunnilladdi di calcesthrutzu pa dugna para, cabi sutterranei, e althru ancora. Lu peggiu, a la faccia di l’ecorogia, è lu chi s’abarà a lagà a l’inginnirazioni di dumani cu’ l’incuinamentu chi abarà a pruduzì dugna para, dugna pannellu, e li batterii, una voltha chi no abarani a sivvì più. Insomma, un’iscenariu curuniari chi abemmu cunnisciddu ‘ià cu’ l’oru di Furtei, indì umbè di ingeui si cridiani di dibintà mirionari, ma a noi ani lagaddu laghi di cianuru, lu l’aschamu di lu merchuriu, arsenicu, cadmiu, piombu e zincu, chi ani criaddu un paesaggiu lunari istheriri. Li mirionari so dibintaddi eddi, li chi tz’ani ingraugliaddu e noi abbauccaddi che pitzinni muccunosi.

Fabritziu Dettori