Itaria 1911: “Morte ai sardegnoli!”

1911. Cumenti un sipariu di tiatru, l’Itaria s’abrisi a lu mondu che bomba di prugressu. I’ li tzincuant’anni soi di uniddai natziunari, tutti, da lu maccu a lu sabiu, s’intindisini itariani. E no fazia nudda si paghissa “libarthai” murisi ammatzaddu mezu sud Itaria pa manu di althri itariani. Cosi d’eddi. Fattu è chi lu “Giubileo della patria” in chiss’annu ischumpassaba tutti li maranni passaddi in un tripudiu di banderi tricururi. Tempi nobi s’erani acciarendi. Era l’annu di la gherra in Libia; di l’Accademia di la Crusca chi fazia tzent’anni; di la “Milano films” chi fesi lu primma film veru e propiu in Europa. Ma sobratuttu era l’annu di la “Belva di Torinu”, la Fiat S76, una macchina di 290 CV chi fazia 200 chm/h (mancu li treni nosthri d’abà) e chi da l’innommu dizia tuttu di l’Itaria. Era l’espresioni e lu vantu di la potentzia economica e di la moderniddai.

In chisthu cuaddru beddu v’erani eddi, li tzitadini itariani no itariani. Chissi di chiss’Isura «Costantemente un’appendice molto incerta d’Italia», cumenti susthinia Camillo Benso Conte di Cavour, e althri, di la Sardhigna. E cassà cumenti tutti chissi nutitzi erani mazinaddi i’ lu cabbu di li sardhi, e ca ischumbattu faziani a vidé la terra d’eddi, furadda di tuttu e lagadda a miseria, e sempri cun un paddronu anzenu a cumandalla. “Ma la Sardegna è in Italia?” (Roma 1907), la prigonta provucatoria di lu libru di Eduardo Cimbali (Catania 1862-1934) pa cumenti era tenta in arretraddezia l’Isura da l’Itaria. Prufissori di dirittu internatziunari i’ l’unibessiddai di Sassari, era contru a lu curuniarismu e a fabori di l’indipendentzia di li poburi.

L’Itaria si prisintesi a li sardhi cu’ la risaredda e l’uffrisi di parthecipà a chissu prugressu in terra d’edda, olthri a la lacana di la Sardhigna. V’era di trabaglià forthi parò, ma lu sardhu no timmi lu sacrifitziu e no timmi di pigiassi. Pa la famiria s’ipacca l’ischina, ma no s’arrendi. Lu chi era pruposthu a eddi era di frabiggà una purradda di lu drettu di ferruvia Roma-Napuri. Un’obara titanica.

Cu’ l’innummaru 10 di Ichnusa di lu 1986 lu prufissori (Tonino) Antonio Budruni, fazia sabé di l’isthragi di dezi operai sardhi. Isthoria fintza a chissu mamentu tenta cuadda. Mancu Antonio Gramsci la funtumesi mai, si puru lu matessi fraddeddu Gennaro Gramsci si desi cuiddaddu a orghanizà un comitziu di prutestha di lu proretariaddu sardhu contr’a chissa «Orrenda carneficina». Gratzie a l’avvucaddu Salvotore Cherchi chi fesi un ischudrognu in loco pa la “Camera del lavoro”, e lu gionnaristha Claudio Demartis di La Nuova Sardegna, oggi sabemmu umbè di chissi fatti grabi chi semmu accosthu a cuntà sutzessi in Itri.

Itri è un paesi itarianu chi oggi isthazi i’ la prubintzia di Latina, ma tandu etra in prubintzia di Napuri, i’ la chi era ciamadda “Terra di lavoro”. Pa tanti sardhi intindì l’innommu di chisthu loggu dazia un significaddu impurthanti abisumeu, e di siguru ralligraba l’ipirantzia di una vidda migliori di la chi faziani in Sardhigna, terra guasi eternamenti curunia. “Di lavoro”, cassà canti volthi chissa paraura si ripitesi i’ lu cabbu d’eddi sugnendi la proiperiddai.

Ni pigliesini a trabaglia milli, pa lu più minadori di lu sud di la Sardhigna. Cuattruzentu pa lu drettu di Itri erani isthaddi apusintaddi in barrachi affaccu a lu cantieri. Li chi abiani famiria pigliesini casa propiu in Itri.

Piglià a trabaglià li sardhi era pa l’imprisari itariani un aorru. La chisthioni chi ni pisabani pa appundarà li nosthri era chi «L’operaio sardo non è neppure di molto rendimento in quanto riguarda la massa di lavoro prestata, soprattutto per le condizioni fisiche depresse e in parte anche per difetto di energia. Il rendimento del lavoro sardo è circa il 60 per cento di quello continentale. […] di rivelarsi le più spiccate particolarità psicologiche, è buono d’indole, ma debole di volontà. Normalmente presenta instabilità. Vengono a provare lo scarso rendimento del lavoro sardo le differenze di salario riscontratesi nelle stesse miniere tra continentali e sardi [li “cuntinentari” pigliabani lu doppiu]. Questo perché ci troviamo di fronte ad una massa ancora primitiva». Da l’“Atti della Commissione parlamentare d’inchiesta sulla condizione degli operai delle miniere della Sardegna. 1911”, indipendenti da li fatti in chisthioni. Chisthu era lu sisthema. Ma lu “sisthema” no dizia chi a Itri v’era puru una purradda di lu sarariu di dà a li “feudatari” di la camorra pa trabaglià in santa pazi.

Chissa cultura intraba parò in cuntrasthu sia cun chissa cussentzia operaia chi tandu s’era iviruppendi pa l’esercitziu di li diritti di chissa crassi sutziari, sia, e sobrattuttu, cu’ la cussentzia millenaria sardha de “s’omine”, ossia di la digniddai, chi no pudia pimmitti chi un ommu pudissia catziggà un althr’ommu. Pa la camorra chistha cultura dubia assé propiu un’anomaria, un’irregurariddai, chi no li fazia imbusciaccarà dinà.

L’itariani abiani sempri intesu fabiddà mari di li sardhi, “ratza basthardha” di laddri e bandiddi. No era diffitziri, tandu, imburumà la genti contru a li minnanni nosthri. Chissi cunsiderazioni, di forthi dischriminazioni a ivulthadda ratzistha, ischumintzesini ‘ià da lu tempu di l’imperialismu romanu, ma è cu’ li Savoia chi si so cunsoridaddi e isthirriddi a tutta l’Europa in tempi moderni. La bozi di li sardhi «Barbari e selvaggi» arribisi fintza in Russia, tantu chi lu sotziorugu di Odessa Giacomo Novicow i’ lu 1904 priguntesi ifuimmazioni propiu a lu prufissori Cimbali. La Nuova Sardegna ischribisi puru un arthicuru a propositu di chisthu fattu. Un razismu forthi, abemmu dittu, vibu fintzamenta i’ li tempi d’abà. Bastha a pinsà a chissa «Sentenza razzista» di lu 25 di ginnaggiu 2006 di un giudizi tedeschu di lu tribunari di Bückeburg chi i’ lu prutzessu pa viurentzia abia cuntzessu l’atenuanti generiche a un imputaddu sardhu acchì pai eddu, sigumenti era sardhu, era «Etnicamenti e culturalmenti predisposthu a la viurentzia a li femmini». Pa cumprindì megliu chisthu razismu “modernu” si debi tinì contu di la forma mentis itariana antisardha chi l’isthituziunarizesi fintzamenta: «Roma, 25.8.1984. Questura di Roma. Oggetto: Richiesta elenco persone di origine sarda, residenti nel territorio del Comune. Per uso di quest’Ufficio, pregasi fornire, con cortese urgenza, l’elenco aggiornato di tutte le persone di origine sarda residenti nel territorio di codesto Comune, corredato delle rispettive composizioni familiari, vicende anagrafiche, attività lavorative e data di immigrazione. – D’ORDINE DEL QUESTORE IL DIRIGENTE LA SQUADRA MOBILE (Dr. Luigi De Sena)». Lu stampaddu maiuschuru è i’ lu documentu originari imprentaddu i’ l’innummaru di Santuaini di lu 1984 di “Il Solco”. Tutti, da li vecci a li criadduri, erani cunsidaraddi putentziari criminari. Althri ischedaturi si fesini puru in althri regioni fintz’a l’anni nubanta.

Si chisthu razismu è ‘sthaddu cussì forthi pogghi anni adabà, pudimmu immaginatzi cument’era i’ lu 1911, e cumenti trabagliabani apprittaddi da chissa mentariddai, e da la camorra, chissi operai sardhi in Itaria. Ma cumenti li giai nosthri no timiani di piggiassi a lu trabagliu, no timiani mancu chissa orghanizatzioni criminari. Infatti da li sardhi no vidisi mai mancu un cittu.

Una rimpidda di fà ischittì. Dugna cosa di maru chi sutzidia in Itri, la cuipa era di li sardhi: un capru espiatoriu paifettu, ma no abbasthesi. La macchina criminari s’orghanizesi a l’ischopu finari d’ammatzà chiss’operai, imburumendi una furria razistha insasthanadda chi La Nuova Sardegna i’ lu 2012 ciamesi «Xenofoba».

Lu marchuri 12 di triura era una dì caldha, fatta ancora più caldha da la faddigga di la tzurradda, ma, grazia a Deu, è dì di paga. E digussì s’attuppesini i’ la Piazza Incoronazione di chissu paesi di Itri. A candu, un itranu passa a cabaddu propriu in mezu a chissa gintoria di trabagliadori atzoppendinni, appostha, a unu fendiru caggì a terra. L’operaiu si ni pisesi cun un’isciumpiaddura in cara. Ni nasci una brea, e da chistha un’affarratoriu. L’itrani ciamani li carabineri chi lesthri si tzi ischudini innantu a li sardhi puntendiri l’aimmi. Arresthani a Giovanni Cuccuru di Silanus. Li minnanni nosthri tzerchani di fà cumprindì a chissi carabineri di l’inzirriadda, ma di ripostha puntani la pisthora in cara a l’arristhaddu minatzendi d’iparallu. A chisthu puntu una deregazioni andesi a Fondi da l’avvucaddi Vincenzo Nardone e Ernesto Di Lauro, chi erani ‘ià in cumbatta contr’a la camorra, pa priguntalli di difindì l’amiggu presu (arristhaddu), e pa abè prutizioni da lu sottuprefettu di Formia. La situazioni era tari chi si dubia orghanizà subiddu cun chissi avvuccaddi lu chi era in prugramma: la custhituzioni di la Lega Sindacari di lu V lotto, la gabura indì trabagliabani chisthi operai, chi propiu pa la dì fattu dubiani tinì un iscioparu e un comitziu a Itri. E abisumeu era propiu chisthu chi timiani la camorra e la ditta Spadari, printzipari di chissi trabagliadori. Ma lu pasu era luntanu, e l’animi inveci d’appazassi s’ivulthesini ancora di più in nivra e in gherra contr’a li sardhi. I’ la matessi piatza di calche ora primma la brea ripigliesi forthi. L’itrani erani pronti. Umbè di sardhi so inchibi. L’itariani di Itri aisitani lu signari chi gumpesi in un tiru di balla umpari a lu tzichirriu «Morte ai Sardegnoli!», althri, più moderaddi: «Fuori i sardegnoli!». Ischumintzesi digussì la «Lezione», la «Caccia ai sardi». Tuttaunora un attruppogliu di foggu, sangu e tzichirri. Fintzamenta l’autoriddai e li carabineri inzirriesini e ipparesini. E in terra li primmi morthi, li primmi firiddi. Lu primma sangu sardhu in terra itariana di chisth’isthoria.

La dì fattu, la dì 13, l’operai chi erani a Fondi turresini a Itri cun la Lega Sindacari fundadda in “Unione operai della Direttissima”, e pa isthà cu’ li custhrinti d’eddi, ma la sigunga dì di gherra era accosthu a ischumintzà. Chissi itariani so aimmaddi che esercitu. Lu signari abà è la campana di la gesgia chi sona lu ribiccu di battaglia. E torra chissu murriggori di tzichirri, foggu e sangu. Che li cani da catza tzirchesini li sardhi in dugna loggu, fintzamenta a drentu di li casi d’eddi, lampendinni li gianni pa ammatzà ca v’era drentu.

In chisthi dui dì li giai nosthri, ommini, femmini e criadduri, so isthaddi accurraddi, custhretti a cuassi i’ la campagna, intantu chi in tanti viniani arristhaddi da la giusthizia. La nutitzia giumpesi in Sardhigna lu 15 di triura cu’ La Nuova Sardegna chi in pimma pagina, cun infuimmazioni ancora minuddi, intuturaba. “Gravissimi conflitti fra operai sardi e meridionali”. S’ischubiesi, daboi, chi tutta la poburazioni era contr’a li sardhi. Il Messaggero, calche dì fattu: “I sardi furono assaliti inermi, fatti segno all’odio di razza”. I’ La Nuova Sardegna di la dì 18, Salvatore Cherchi ischribia: “La Sardegna tutta dovrà protestare con tutte le sue forze contro un episodio tristissimo di cannibalismo e di odio di razza […]”.

Un «Atto più o meno criminoso» abarà a dì a lu prutzessu l’avvucaddu Angelo De Stefano a difesa di l’itrani. Pa chissi operai, cun cussentzia di trabagliadori, nisciuna pieddai cristhiana e nisciun’amparu operaiu, nisciuna fraddilantzia proretaria da l’itariani. In chissi dui dì li sardhi morthi ammatzaddi so abisumeu dezi, ma v’è ragioni di cridì chi so isthaddi umbè di più. La gusthizia itariana n’abarà a riccuniscì tre. L’innummaru pritzisu nisciunu è mai guntu a sabellu acchì tanti morthi so ‘sthaddi, cumenti dizini li cronachi di tandu, cuaddi e lampaddi cassà indì. E cassà canti famiri ani aisittaddu a indibadda li parenti d’eddi chena pudelli recramà. Di chissi tempi no era fatziri. Li firiddi so ‘sthaddi abisumeu una sessantina, e tanti di chisthi so morthi in consiguentzia di chissi firiddi ch’abiani. E tanti so isthaddi li sardhi chi la gusthizia arristhesi, e tanti althri ancora bugaddi, lincintziaddi, a fóra da chissa “Terra di lavoro” e fatti ricuiddà a fotza in Sardhigna. A tuttinuna famiri intrei, puru cun pitzinni minori e criadduri, si so auddi chena nudda, visthuddi a isthratza che profughi in gherra, i’ lu viaggiu di turradda in Sardhigna. Abiani pagaddu cu’ lu sangu lu fattu d’assé sardhi.

L’avvucaddu Guido Aroca i’ lu gionnari sassaresu ischribisi: «Se alcunché di simile si fosse verificato ai danni di siciliani o romagnoli, l’Italia tutta sarebbe oggi in fiamme».

Dui anni addaboi, i’ lu 1913, si tinisi lu prutzessu contr’a trentadrè itrani. Nobi so isthaddi subiddu cundanni a 30 di garera acchì erani in contumacia, cumenti cumandaba lu codizi penari di tandu. Ma lu varori di lu prutzessu è tuttu i’ lu dibattimentu chi sighisi: dimusthrà «La legittima difesa di una folla» a lu carattere viurentu e l’inferioriddai umana di li sardhi.

I’ l’udienza di lu 2 di maggiu 1914 li sardhi dibentani “Il bastardo” di Fonni di lu rumanzu Cenere di Grazia Deledda: «È la storia dell’anima del popolo sardo che protende i’ suoi sogni di elevamento civile verso il continente, verso la patria eterna, nel cui tumulto di passioni e interessi si sente ancora lontano dalla madre patria, ancora spezzato e umiliato come un bastardo». E ancora: «Da dove viene questo popolo di cui si fa interprete l’anima di una donna?». Eddu dazi la ripostha: «Viene dalle tenebre di un mondo – diventato leggendario – di grassazioni, rapine, di bardanas, di imprese brigantesche», dizisi i’ l’arringa fatta a libru in “La rivolta di Itri – Legittima difesa di una folla”. Vallardi editori, Napuri. Li parauri di la Deledda so «Una requisitoria contro il vecchio mondo che resiste in Sardegna».

E candu calchunu: «Tesse elogio e dice che la pioggia e il sole c’è per i’ buoni e per i’ cattivi». E chi tuttu lu mondu è paesi, De Stefano aggabba: «Come se per ritenere un delinquente un individuo lo si dovesse veder delinquere tutti gli attimi della sua esistenza e per ritenerlo eroe ci dovesse ammannire un eroismo al minuto? Come se per ritenere depravato un dato popolo si dovessero presentare depravati tutti i singoli cittadini?». Pa lu fattu chi: «Il verme di un organismo, anche un solo verme, è segno di putredine».

Li sardhi so cumenti: «Il cieco nato non conosce, la luce. Il popolo sardo, dall’anima ingombra di pregiudizi e scetticismo, non la conosce ancora la luce – parini li parauri di lu Savoia Goseph de Maistre – dello spirito. Non conosce altra forza che quella dei muscoli e dei nervi. Il valore della vita lo sente e lo trova nella forza materiale, nella violenza, nella prepotenza. E se emigra, se viene nel continente, in altre regioni, dove sa o per lo meno sospetta che come sardo, come isolano, come dimenticato isolano, non è stimato, egli ricorre a tutti i mezzi violenti per infondere nel paese ospitale, col terrore, la stima e il rispetto». E tandu: «Non un colpo, ma due, tre per volta», e ancora impreani la dinamite: «Con la disinvoltura degli addomesticatori di Belve, l’hanno a portata di mano il più spaventoso mezzo di distruzione. Essi, i forti minatori della Sardegna, saprebbero far saltare in aria tutto il paese come giocattoli di carta pesta e seppellire tutti gli itrani sotto le macerie […] La dinamite per i forti sardi è il fastigio della potenza». Tuttu lu cuntrariu di lu chi dizesi la commissioni parlaimintari funtumadda. Eddu matessi si n’era ischuntzendi lu sisthaddu. Si era isthaddu veru, infatti, chissa «Stirpe bellicosa» abaristhia impriaddu chissa fotza pa difindissi e vindicassi. Daboi De Stefano ipiega chì lu poburu sardhu: «Non ha risentito di nessun beneficio dai commerci, dall’industria, dalla civiltà di altre genti, perché bellicosa; perciò fiera». E fazi un excursus funtumendi a Hiosto e a Ampsicora «I sardi furono i peggiori schiavi. I romani li chiamavano: pessimi sardi. Tutti i popoli trascinati in catene per le vie di Roma, dietro i carri dei trionfatori, chinavano il capo innanzi alla gagliardia e alla disciplina del civis romanus; i Sardi, no. I Sardi si uccidevano, più che servire. Pessimi schiavi!». Cuntinua cu’ l’isthoria di li duminadori, e «Unico periodo di tregua e di riposo quello del dominio savoiardo [!]. L’amministrazione, l’istruzione, le finanze sorsero a vita nuova. Ma anche in tanto fervore di vita, lo spirito bellicoso non si spegne; seguitano le imprese dei banditi; cresce la sfiducia e il disprezzo per i funzionari governativi, fino a scoppiare nel 1794 in una terribile sollevazione contro i funzionari stranieri». Era fendi riferimentu a chissa chi dibentesi Sa die de sa Sardigna, la festha natziunari sardha di lu 28 di abriri. Pa eddu l’isthoria di li sardhi è: “Una stratificazione storica di aridi detriti morali”.

Nisciun’itranu è isthaddu morthu o firiddu in chissi dui dì gherra. Eppuru a lu prutzessu si dizesi chi li sardhi abiani cumparaddu (cumparaddu!) da una aimeria tutti l’aimmi, e chi l’erani prubendi pa dà attaccu a lu paesi, acchì cu’ la dinamite, funtumadda fintza a ivirì, erani ‘ià pratigghi e n’abiani umbè. Dunca: «L’unica salvezza» è ammatzalli a chissi «Sardegnoli». Ingenui chissi giai nosthri chi no s’abizesini di lu chi s’era appruntendi contr’a eddi. Fattu è chi si avveru chissi trabagliadori abussiani auddu tutti chiss’aimmi, “cumparaddi”, e chissa dinamite, no soru abaristhiani ivulthaddu chissu paesi di Itri ma tutta l’Itaria. Chisthu è siguru, pagosa chissi di li «Virtù primitive», li «Belluini», cumet’erani ciamaddi l’antigghi nosthri, ni desini proba calche annu addaboi i’ la primma gherra mundiari cu’ la Brigata Sassari. Si fesini massacrà pa chissa Itaria, e dibintesini «Eroi pieni d’energia; baldi, incrollabili e stupefacenti». Abiani chisthi virthi, ma no candu rivindicabani lu matessi sarariu e diritti di li “colleghi” itariani. Abia rasgioni Francesco Masala «Nois sardos, cando semus bios, semus totu malos. S’unicu sardu bonu est su sardu mortu». Chissu prutzessu tinisi una piggia ratziari, cumenti desi proba puru l’avvucaddu Francesco Manzi. Accò cosa dizesi: «Ma egregi avversari, il delitto di razza è quello deplorato dal Niceforo, ed è proprio del popolo sardo, di quella gente cioè che lo compie per disposizione innata, che lo compie per atavica tendenza, ignorante della santità dei diritti […] il delitto di razza è quello caratteristico di alcune regioni sventurate d’Europa, nei cartogrammi del Ferri, segnate, tristemente in rosso». «Sanguigno! Questo è il delitto di razza, egregi avversari di P.C. E la Sardegna è tutta segnata di rosso». Niceforo, Ferri…

Parauri chi i li tempi attuari s’iprecani cu’ lu pritzisaddu di chissu «Istinto predatorio tipico della mentalità barbaricina», cumenti affimmesi i’ lu “luntanu” 2016 lu procuradori generari Roberto Saieva.

Li sardhi erani, cumenti abemmu funtumaddu, accusaddi di tuttu, «L’unica salvezza: la caccia ai sardi». E mentri noi semmu diricuenti pa predipusizioni, «La folla non sa quello che si faccia, quindi non risponde a quello che fa; perciò non delinque».

E tandu: «Voi, giudici eletti [tutti itariani], siete chiamati a riprodurre in voi al vivo, sul nostro esempio, l’avvenimento, e a rivivere tutte le passioni in contrasto che determinarono l’esplosione più o meno criminosa». È la ciamadda di De Stefano. La gusthizia ripundesi: tutti assolti! 

Lu prutzessu, tentu a Napuri, ischumintzesi lu 16 di naddari di lu 1913 e accabesi lu 28 maggiu 1914.

Li vittimi di chiss’isthragi no ani mai auddu gusthizia.

Antonio Budruni i’ lu libru “I giorni del massacro” à ischrittu: «Tutto accadde così come era stato previsto e stabilito. Le vittime divennero colpevoli e il silenzio, durato fino ad oggi, completò l’opera».

L’illusthrazioni è di Luciano Fele pigliadda cun autorizazioni a trattalla da Itri 1911 di l’obara musicari di Gigi Acquas https://www.youtube.com/watch?v=NKovuVOgC04

Fabritziu Dettori