Isetende sa Die… in Casteddu

Chenàbura 11 de abrile in Casteddu, in su Espace Peacock in bia Campidano 24, ant presentadu Aspettando Sa Die.

Sunt eventos, chi ant a antitzipare e acumpangiare sas tzelebratziones pro Sa Die de sa Sardigna de su 28 de abrile, organizados dae realidades indipendentes de su mundu culturale, impresariale e enogastronòmicu.

Fiant presentes: Riccardo Pisu Maxia, presidente de Assemblea Nazionale Sarda, chi promovet s’initziativa, Federica Marroccu in collegamentu vìdeu, Frantziscu Cheratzu chi cun sas editziones Condaghes e NOR dat unu cuntributu mannu a su cartellone dende su ruolu de protagonista a s’istòria de sa Sardigna in sièntzia e limbàgios gràficos e visivos.

Presentes puru duos de sos patrotzinadores econòmicos: Vito Arra, fundatore de I Sapori d’Ogliastra e Pierluigi Fais, coghineri chi at abertu sos locales Josto, Framento e Etto. A sa fine de sa presentatzione ddo’at àpidu unu cumbidu.

Pro su chi pertocat s’antìtzipu de sa festa si cumintzat su 18 de abrile cun sa projetzione de su curtzumetràgiu de NOR Films Cast in bronze, a sas 18,30 in bia Tempio 22, sede de s’assòtziu Terra Battuta.

Sa die in fatu, a incuru de Federica Marrocu, a sas 16,30 est in programma unu tour, dae pratza Yenne, cun in prus un’aperitivu temàticu, intituladu L’ingombro dei Savoia nei nomi delle vie.

A sas 18,30 Artesanias, cun Barigamus su connotu, cumbidat s’aperitivu in bia Portoscalas 41.

Su 22, a sas 18,00, ant a presentare su libru Istòria de Sardigna, de NOR editziones e ant a projetare su cartone animadu, de NOR Films, 28 de abrile de su 1794, in bia S. Salvatore da Horta 2, sede de sa Fondazione di Sardegna.

Su 23 addòbiu, a incuru de Condaghes e NOR, intituladu Domus de janas: la strada verso l’Unesco, cun sa professora Giuseppa Tanda, in bia Tempio 22.

A pustis de custu antìtzipu, dae su 26 a su 28 de abrile ddo’at a àere àteras initziativas pro afestare Sa Die de sa Sardigna.

Aspettando sa Die, laboratòriu colletivu de identidade intre istòria, arte e sotziedade, est possìbile pro more de Terra Battuta, Condaghes, NOR, Fratelli Medas e Eja TV in calidade de media partner.

(gm)