“Fallu fabiddà!”, corsu di sassaresu
Dugna marchuri a li 17,15 i' l'aura magna di l'ischora di Santu Giuseppi
Da lu disizu e lu piazeri di genti di Sassari, e di l’intorri, di fabiddà e ischribì in sassaresu è naddu”Fallu fabiddà!”, corsu di sassaresu 2023/24. Ischumintzaddu arimani, ottu di santandria, lu corsu è dedicaddu a la bonanima di la masthra Gabriella Oggiano.
L’adisioni so propiamenti umbè (più di 80!) chi dubaristhiami priguntà lu Paratzettu!
La Regioni a dorumannu traschura la linga sassaresa da no pimmittì, di fattu, l’imparu i’ l’ischori drentu a l’orariu curricurari, ma l’idioma nosthru è cussì vibatzosu e cuntagiosu da ischumpassà li mura isthorigghi di la tziddai!
Li lizioni abarani a assétenti sa Fabritziu Dettori, alliaddu da sempri di la linga sassaresa, è isthaddu docenti esternu, umpari a la masthra interna Gabriella Oggiano, pa dez’anni i’ l’ischora erementari di Santu Giuseppi, e althri ischori di la primaria e di l’infantzia, divulgadori i’ li mezi d’infuimmazioni.
Olthri a li lizioni abaremmu a prupunì escursioni guidaddi in sassaresu i’ lu territoriu sassaresu.
Lu corsu, di la duradda di 30 ori, abaràa tinissi dugna marchuri a li 17,15 a ischumintzà da l’8 di santandria i’ l’aura magna di l’ischora di Santu Giuseppi a Sassari, carrera (via) di Enrico Costa 63. Abarà a asséfruniddu gratuitamenti lu materiari didattiggu, e tandu l’attisthaddu di fricuentzia a l’accabbu di lu corsu.
Turremmu gratzia a lu dirigenti di l’ischora, lu prufissori Luciano Sanna, pa la dipunibiridai e la passioni dimusthradda pa la linga nosthra. Pa l’Ischora di Sassaresu, Cristina Sanna. Pa ASD Camminare per Sassari, Patrizia Loperfido. Pa CSS (Cunfederazioni sindacari sardha) e Uffitziu d’isthudiu Giovanni Maria Angioy, Claudio Deligios.
