Bànari afestat a Santu Larentzu

Dae su 9 a s’11 de austu sa bidda de su Meilogu est in festa pro Santu Larentzu. Su mangianu de sa primu die ant a fàghere s’ùrtima chirca peri sas domos, che a ogna domìniga dae s’ùrtima chida de làmpadas.

Su tzocu de sos coetes, mutidos sos boladores, acumpàngiat su passàgiu de su comitadu, a sonu de pipajolu e de tumbarinu.

A sas ses e mesu de sero ddo’est sa missa e su note, a sas deghe, ddo’est s’ispetàculu pirotècnicu in su campu isportivu. A coa at a sonare su chitarrista blues Francesco Piu e a pustis sa mùsica sighit cun The Tribal Sound dj set, cun Zanfranco dj e Nanni Solinas.

Giòbia 10 a sas 8,30 faghent sa missa e a sas 11,00 sa missa cantada, tzelebrada dae mussegnor Pietro Meloni, cun s’acumpangiamentu de su coro de Buddusò. A sas ses e mesu de sero ddo’est sa professone, cun s’isfilada in bestimenta traditzionale de Bànari, Piaghe, Òsile e Ulìana. Sos grupos folk de custas ùrtimas tres biddas s’ant a esibire in pratza paris cun su coro Paulicu Mossa de Bonorva.

Sa de tres dies a sas 11 ddo’est sa missa de s’emigrante. Su sero est dedicadu a sos ispetàculos: a sas ses de sero in pratza della Palma ddo’at giogos pro sos pipios; a sas oto, in pratza Umberto I, cumintzat sa mùsica reggae cun sos Hi-Vibes e sos Isla Sound e sighint, a sas deghe, sos Mellow Mood. S’intrada est de badas.

Pro sos apassionados de cantu a poesia a sa matessi ora, in pratza de sa crèsia de Santu Larentzu, ddo’est sa gara cun Saverio Sodde de Irbono e Giovanni Carta de Ardaule, acumpangiados dae su tenore de Sòrgono.