La butrea chi fabedda sassaresu

Sassari è una tziddai chi è tanchendi. Li serrandi atzadddi di li butrei di lu tzentru cu’ la gintoria chi attruppugliaba li carreri è soru un ammentu beddu.  Lu chi vidimmu abà, una tziddai biodda, dazi un sintiddu di tristhura. Ancora più tristhi è di vidé li giobani parthisinni a fóra e chi si fazini trazadori invuruntari di li chi rimanini.

È avveru un piazeri, tandu, di vidé dui pitzinni, Jusepi Larentu Sanna e Giuseppe Monte, chi ani auddu lu curaggiu d’abrì un’attibiddai a lu tzentru isthoriggu di Sassari. La butrea, inaguradda calche dì adabà, si ciamma, appuntu, La Butrea, un Barber Shop chi Farendi in Piatza è a l’innummaru 30, (C.so Vittorio Emanuele 30). Cun più di dez’anni d’ipirientzia i’ la faculthai di baiberi chisthi dui giobani so maghi di foibitza e ipiglioni.  Juseppi, ricuiddu da l’Austhraria indì era emigraddu, e Giuseppe ani fidutzia i’ la terra e i’ la tziddai chi l’à pisaddi.  E a vidé lu tzentru chi tanca no li piazi a eddi, e tandu cun un segnu d’isthima e amori ani isciubaraddu d’abrissi una butrea propiu inchibi pa dà un poggu di vidda a Sassari Vecciu. Un cuntributu, dunca, utiri a fà attiba torra la tziddai e chi dazi ipuntugliu a li sassaresi matessi a cridì in chistha terra, e in chissu cuarthieri.

A la ciamadda di Sassari li dui Guseppi ani riposu omaggendiru cu’ la linga soia dassendi fabiddà in sassaresu l’insegna di lu Barber. Una mentariddai muderna chi à cumpresu chi una tziddai pa turrà a nascì bè debi ischumintzà a fà pazi cu’ l’identiddai linghisthigga soia chi la fazi unica e chi megliu la rapprisenta. Lu modellu culturari di chisthi giobani è un esenpiu sia pa li sassaresi sia pa l’isthituzioni comunari.

Fabritziu Dettori