Sassari chi leggi

Lu sani tutti, oramai, chi a l’itariani no li piazi troppu a liggì. E li sardhi, a parthi Cagliari chi è la di setti in Italia, no so assai dibessi da l’althri zittadini. Inveci Sassari in chisthi ultimi anni è isthadda numinadda propiu cumenti una ziddai chi leggi.

A dì la viriddai no è tuttu nieddu. Sempri di più s’azzendini luzareddi impurthanti: festival, festhi di lu libru, “club” di lu libru, prisintazioni cu’ l’autori, mosthri di l’editoria. Ma v’è puru un althru signari nobu e assai beddu, chi puru a Sassari è punendi radizi: so li gruppi di chissu chi l’ingresi ciàmani “silent reading”, saristhia a dì liggi a la mudda. Calchunu podaristhia pinsà chi è un’isthrabaganzia, ma no è digussì: bastha piglià parthi a unu di chisthi attoppi pa’ ciambà gidea.

E tandu cumenti àndani li cosi? Un zerthu innummaru di passoni, di cassisia eddai (francu li criadduri, chi ani althri occasioni orghanizaddi soru pa’ eddi), puru si no si cunnoscini, si pònini d’accordhu pa’ andà in un loggu, megliu si aberthu, – ma anda be’ puru una biblioteca… – cumenti po assè lu mari, una campagna, lu giardhinu prubbiggu, insomma un loggu tranquillu. Dugnunu si portha fattu un libru chi li piazi e un teru pa’ pusassi si v’è l’èiba. Dabboi d’abè isthudaddu li terefoni, pa’ una quarantina di minuti dugnunu si leggi un poggu di lu so’ libru e dabboi, libbaramenti, po dì a l’althri cos’à liggiddu, ca arghumentu d’intaressu à attuppaddu, ca impressioni n’à buggaddu e da chisthu parthi lu contributu di l’althri di lu gruppu, chi abarani a dì lu chi pensani, a fabori o no, aggiugnì althri impressioni. Nasci digussì un beddu ciambu di gidei, una dischussioni chi seivi a tutti, acchì tutti poni aischulthà e fassi aischulthà, dendi e pigliendi ricchezia, ma fendi puru nascì la pussibiriddai d’abé amigghi nobi, amigghi di libru ma no soru!

Tuttu chisthu è di siguru un aggiuddu assai impurthanti pa’ la diffusioni di li libri, ma è massimamenti una pussibiriddai d’attoppu pa’ passoni d’eddai e sintiddu dibessi, cussì chi tutti poni imparà, cunniscì libri e autori nobi, mondi e logghi mai intesi, abrì la menti a un’althra manera di cunsidarà la vidda, a un althru puntu di vistha chi no sia soru chissu a lu ca semmu affiziunaddi: la dibessiddai è un siddaddu, sempri! E si po puru aggiugnì chi pigliassi un paggiu d’ori di pasu in cumpagnia di li libri e d’una greffa d’amigghi no è cosa di poggu contu, visthu chi oggi semmu sempri tutti in pressa, dugnunu cu’ li so’ pinsamenti, currendi a drestha e a manca pa’ acchippì a tuttu! Tandu liggì a la mudda e in cumpagnia fazi propiu be’ a lu saruddu!

Pa’ lu chi riguardha a Sassari, feddi attinzioni a Facebook e Instagram, undì s’acciappa la pagina di Silent reading Sassari, gruppu chi orghanizeggia l’attoppi (no si paga nudda!). Si no seddi cunvinti, prubeddi una voltha a andavvi: soggu siguru chi no vi n’abareddi a pintì!

Mario L. Marras