S’ùrtimu Miyazaki

A pustis de 10 annos dae Si alza il vento Hayao Miyazaki, maistru de s’animatzione chi at creadu, pro nd’ammentare calicuna, òperas che a Il mio vicino Totoro, Porco Rosso e La principessa Mononoke, at torradu a realizare unu filmi. Su tìtulu italianu est Il ragazzo e l’airone.

S’artista giaponesu pro custa pellìcula at leadu a modellu diferentes libros: The book of lost things, de s’irlandesu John Connolly, Kimi-tachi wa do ikiru ka, de Genzaburo Yoshino e Yuki no to, de Ranpo Edogawa.

Est su contu de unu pitzinnu, Mahito, òrfanu de mama, chi paris cun su babbu e sa tzia si nch’andant dae Tokyo pro si nche fuire dae sos bombardamentos de s’ùrtimu cunflitu mundiale e si nche tramudant a sa domo de famìllia in su sartu. Acanta de cudda domo ddo’at una turre manna de pedra mesu derruta. In ie e pro more de unu corbu ambiddàrgiu ammajadu Mahito at a connòschere unu mundu fantàsticu.

In sa pellìcula, dae su ritmu lenu, chi dda faghet assimigiare in custu prus a Si alza il vento chi no a sas àteras produtziones de s’istùdiu Ghibli, prus movimentadas, s’autore de Conan il ragazzo del futuro afrontat su tema de su tempus chi passat, cun s’innotzèntzia de sa pitzinnia a unu chirru e sas tragèdias de sa vida a s’àteru.

Su protagonista bivet a metade caminu tra unu mundu de incantu, chi diat pòdere sestare a praghere suo, e su mundu reale, in ue tocat a atzetare finas sos dispragheres e sas pèrdidas.

In su fundu sa segunda gherra mundiale, chi Miyazaki at bìvidu a pipiu piticu e chi at lassadu una rasta dolorosa in su pòpulu giaponesu.

S’òpera, càrriga de poesia e malinconia, si presentat duncas comente su testamentu artìsticu de s’autore.

Sos personàgios pintados dae Miyazaki sunt che pare galanos che a sos de sas àteras pellìculas, cumintzende dae su corbu ambiddàrgiu, figura ligada a sa mitologia de s’artzipèlagu de su Sole Essende.

De signalare, pro sa prima borta in sa produtzione miyazakiana, sa presèntzia de aizigheddu de gràfica computerizada. A cumpletare s’òpera ddo’est sa mùsica de Joe Hisaishi, collaboradore istòricu de Miyazaki.

(gianni muroni)