Masthru Bruno Loi: «Sonniu una Sardhigna di sunadori di launeddas»

Li launeddas so l’isthrumentu sardhu di lu propiu chi cu’ li soni soi à accumpagnaddu l’isthoria di la nazioni sardha. La tisthimuniantzia più antigga di chisthu isthrumentu è lu bronzettu nuragicu dataddu tra lu VII-VI securu primma di Cristhu, e isciddu a pizu i’ li primmi anni di lu 1900 in Ittiri. L’isthatuina, chi abesumeu rapprisenta un sacerdoti in un mamentu di tzerebrazioni ipirituari, è impurthanti acchì tzi fazi vidé chi la manera tecnica di sunà chisthi tre canni è la matessi di oggi. Una cuntinuiddai culturari chi à arrischiaddu d’isthudassi i’ l’anni trenta di lu ‘900 candu a sunalli era rimasthu soru calche masthru i’ lu Campidanu e lu Sarrabus. Abà parò s’è cumpresu chi la moderniddai po caminà umpari a tutti l’erementi di la sardhiddai, linga, cultura, tradizioni, chena punilli a cantiggu di moscha. Accò tandu chi li launeddas so vibendi un branu nobu di cunchistha noba drentu a li sardhi. L’afficcu l’à posthu la “Costituente per Sassari” chi lu 7 di santandria passaddu à orghanizaddu un attoppu tecnicu pratiggu inné la sedi di viale Umberto in Sassari cu’ lu mastrhu di launeddas Bruno Loi, la dischenti soia Anna Rita Pillitu, e Francesco Moretti, cultori di chisthu isthrumentu. È ‘sthadda tandu ipiagadda l’isthoria e cumenti si sonani li Launeddas, li tipurugii soi, e althri isthrumenti a suru sardhi che li Benas e mundiari cumenti lu wulusè cinesu. V’è ‘sthadda daboi l’esecutzioni di brani antigghi che Accumpagnamentu a la prutzissioni e celesti tesoru.

Pa Bruno Loi è isthadda l’occasioni di attuppà li dischenti soi chi calche annu adabà candu in Sassari tinia corsi di chissu isthrumentu. A Bruno, dischenti direttu di Su Mastru Dionigi Burranca, abemmu fattu calche prigonta.

Pudimmu dì chi li launeddas so archeorogia chi vibi?
«Emmu. Di siguru, in tutta l’isthoria chi ani visthu passà, ani auddu sempri amantiosi e un poburu chi l’à identificaddi propiamenti cumenti “la musigga crassica sardha”».

Cantu so ‘sthaddi utiri musicisthi che Angelo Branduardi, David Liebeman, e Ornett Colleman, e althri, a fà ischubià chisthu isthrumentu, e a fà cumprindì a li sardhi chi li Launeddas so un mutibu d’orgogliu?

«L’artisthi chi ai funtumaddu so ‘sthaddi un amprificadori, parò, pa l’ischora nosthra, chi à un’impusthazioni di l’apricazioni di la tradizioni, no so chissi li cuntesthi pa li manifesthazioni soi».

È veru chi li masthri di un tempu erani girosi di dà imparu di chisthu isthrumentu?
«Emmu. Un tempu era digussì. I’ l’anni ’40 e ’50, ca sunaba abia la pussibiriddai di assé ciamaddu a li festhi e a assé pagaddu bè. E in chisthu periodu chi s’iviruppa, dimmu cussì, la prufissioni di sunadori».

Canti ischori di Launeddas e, tandu, isthiri, isisthini?
«Fintza a poggu tempu adabà v’erani tre ischori impurthanti, chissa di Dionigi Burranca, la di Aurelio Porcu, un mastrhu di lu Sarrabus, e Luigi Lai, puru chisthu un masthru di la tradizioni di la matessi regioni di Porcu».

Ca diffarentzia v’è tra un’ischora e l’althra?
«La dibessiddai è i’ l’esecutzioni di li brani. L’ischora di la bonanima di lu masthru Burranca è la più antigga. Eiu, umpari a lu masthru Sergiu Lecis, semmu l’unici a purthà adanantzi, sendi noi l’unici chi ani ritzibuddu in modu cumpriddu l’erediddai, l’impari di la tradizioni orari da chisthu masthru mannu avveru».

E cosa vi pari a voi di l’ischora antigga la cumbinazioni cu’ lu jazz?
«È sempri una ipirimentazioni. Lu masthru nosthru chi collaboresi cun David Liebman, Ornette Colleman, a eddi li dizia: “Chistha è la musigga mea”, e sunaba. Erani eddi chi si adeguabani a eddu, e no eddu a eddi».

Launeddas, folk o cultura?
«Launeddas cultura! Acchì cu’ lu folk saristhia bugganni pessonariddai culturari e identiddai».

I’ la primma lizioni cosa dai imparu?
«La maia di lu suru cuntinuu. Ischumpassà chisthu ischarinu chi a l’ischumentzu pari chi sia diffitziri, ma una voltha affiagnaddi da lu sonu di li launeddas, chissa maia s’impara chena prubremi».

Li Launeddas è soru musigga, o altrhu?
«So la bozi interna chi dazi caratteri a lu poburu sardhu. Un sintiddu althu, a volthi è di gosu, a volthi di durori, chi s’ipreca in musigga. Lu sonniu meu è poburà la Sardhigna di sunadori». 

Cosa à pessu lu baddu antiggu accumpagnaddu da li Launeddas?
«I’ l’anni ’30 lu baddu in Sardhigna, è propiamenti i’ lu Campidanu di Cagliari, era un’isthituzioni, tant’è veru chi li giobani chi no erani cuiubaddi (li vaggiani) abiani l’aprettu di cuntattà un sunadori prufissiunistha chi dubia rindissi dipunibiri pa un annu intreu pa accumpagnà li festhi ririgiosi e profani. E paghisthu si fazia un cuntrattu inné lu nutaiu. Abà li cosi so ciambaddi e l’isthiri di vidda s’è posthu a fotza sobra chissa cultura, e lu chi era primma è soru un ammentu. Oggi li passoni andani a ischora di baddu sardhu (standardizadddu) e baddani i’ li piatzi cu’ lu sunadori di sunettu a dannu di lu sunadori di launeddas. E chisthu è sutzessu acchì s’è pessa la pisaddia a aischulthà, e puru acchì lu sunettu s’è isthabiriddu di priputentzia».

Li benas so più antigghi di li launeddas. A tzi voi ipiagà la diffarentzia di la “lancia” tra lui isthrumenti? 
«Li benas so un isthrumentu di la tradizioni sardha di siguru più antigghi di li launeddas. Si differentziani da chisthi pa la costhruzioni e pa lu modu di sunalli. So fatti di dui canni liaddi umpari cun un ippau impriasthaddu a pezi: una fazi da contrabassu e l’althra da canna merodica. Li diddi si ponini dui pa manu i’ li cuattru pasthusi impriendi la tecnica di lu suru (arenu) tzirchurari cumenti i’ li launeddas. Dugna ancia è fatta puru edda cu’ la canna e cu’ la matessi costhruzioni di li launeddas. La diffarentzia è chi i’ li benas no si poni la tzera pa l’accurdhaddura. Si la canna s’abbascia di tonu bisogna ischuppuralla fintza a candu la nota no è giustha».

Acchì chisthi isthrumenti si debini accurdhà di cuntinnu?
«Li Launeddas, cumenti li benas, so fatti di canna, una canna naturari parthicurari, tandu risentini sia di l’effettu crimatiggu sia di l’umididdai di la bocca chi fazi ciambà lu tonu di l’isthrumentu».

Canti tipi di Launeddas isisthini?
«Li launeddas so imparthuddi in famirii, li printzipari so: mediana, punto d’orghanu e fiorassiu. Chisthi s’iviruppani in vari tonariddai limitaddi a sigundu di cumenti abrini li diddi li sunadori. Di chisthi isthrumenti si so ivirupapaddi daboi althri cumbinazioni, cumenti lu spinellu, la fiuda, lu contrapuntu e la simponia, chisthi puru con tunariddai dibessi».

Ti turremmu gratzia pa l’arrasgiunadda, Bru’.
«Gratzia a voi di SARdies!».

Fabritziu Dettori