Lu sassaresu, varghogna e dialettizazioni

Lu sassaresu è una linga chi no à fattu carriera. Un dicciu ciambaddu di “Un diarettu è una linga chi à fattu carriera” di lu linghistha e docenti di diaretturugia di l’Unibessiddai di La Sapientzia di Roma, Ugo Vignuzzi. Lu cuntzettu di linga in Itaria è naddu i’ lu ‘500 da l’ischrittori famaddi chi abiani isciubaraddu che “linga”, cumenti sani tutti, chissu diarettu fiorentinu letterariu di lu ‘300 fendiri fà, appuntu, carriera. Più o mancu lu prutzessu pa acchirì lu sthatus di linga è digussì pa tutti li “diaretti”. Fendi la rasgioni pa lu sardhu si po dì chi si un tempu la chisthioni era puritigga, cu’ esthensioni di la pruibizioni di ipricallu a ischora e, pa rifressu, in famiria, abà la situazioni è, guasi, ciambadda. Abà v’è la cussentzia chi la linga mamma no fazi mari, antzi, e chi no s’anda a l’inferru si unu la fabedda, e l’impara. È di tinì in cunsideru chi no v’è, e no v’è mai isthadda, una leggi chi dizi chi no poi fabiddà la linga toia, punimmu lu sassaresu, in famiria e a to’ figliori. Eppuru no lu trattani mancu in chissi famiri indì li figliori l’imparani a ischora.

La cussentzia debi fà li conti cun chissu cunditzionamentu mentari di securi di curuniarismu itarianu, ‘ià piemuntesu, chi à inferiorizaddu li sardhi a ischumbattu di la rapprisintazioni culturari e linghisthigga “pristhigiosa” di lu puteri di fóra. Abà, i’ lu 2024, si debi assé sintzeri, e dì chi li sardhi si so autosuttumittendi a l’itarianu a lu puntu chi so fendi muri eddi matessi la linga d’eddi. Chisthu è deteimminaddu da la mancantzia di curaggiu d’assé, e di manifisthà la genuiniddai sardha più vera chi soru la linga po abé e traimittì. Lu sassaresu, e lu sardhu, portha disaggiu e tz’arriggi di fabiddallu in tanti situazioni, cumenti a l’inginnirazioni noba, guai a li figliori. Una limitazioni chi piglia l’innommu di Sindrome da Varghona Linghisthigga. Ni suffrini guasi tutti li sardhi, masci e femmini, babbi e mammi, chi si credini libari, e veri sardhi, ma chi daboi timmini d’assé sthigmatizaddi si iprecani sassaresu, o cassisia althru sardhu e, lu ripettu si mancarri no s’è cumpresu, a li figliori. No voni fà “Brutta figura”. Lu chi conta di più pa li sardhi, paraura abusadda, ischuseddi, è assé lu più pussibiri rapprisentatibi di la linga itariana. Lu fattu è chisthu, no v’è nudda chi fà: la varghogna è più forthi di la cussentzia in Sardhigna. Vuriami la leggi. Simmai un poburu aggia bisognu di una leggi pa assé lu chi è! E abà v’è la leggi, antzi vi so li leggi, natziunari e regionari, chi tuterani lu sardhu, e chi tzi dizini chi pudimmu fabiddallu. Ma dimmi tu! Lu sassaresu matessi è ricunnisciddu da la leggi di la Regioni. Nudda!

No abbastha, infatti, chi una linga si riccunniscidda tari pa fà carriera. Lu sardhu, pa esenpiu, ma no lu diggu eu, sia ciaru, l’ischribini li linghisthi i’ li manuari d’eddi, è una linga riccunniscidda unibessaimmenti cun una pecuriariddai soia ipitzifigga, ma chi di fattu è che pari a cassisia diarettu itarianu pa la funtzioni sutziari chi à, e pa una mancantzia di una pruipittiba di linga di vibì.

Sempri l’aiperthi, lu diggu sempri digussì arumancu ca leggi vi credi di più, dizini, e ischribini, chi una linga pa assé linga a tutti l’effetti, à nitzissiddai di calche erementu sotziu-linghisthiggu di punì afficcu. È impurthanti, tandu, e chisthu vari puru pa un diarettu chi si vo fà linga, chi sia impriaddu fintza da un tzetu sutziari mediu-althu: prufissiunisthi, docenti, gionnaristhi, terevisioni, amministhrazioni pubbrigghi, unibessiddai, ischora, puritigga, ischrittori. Lu sassaresu parabà è trattaddu poggu da tutti, e vibi una cundizioni peggiu di chissa di lu sardhu.

Prubemmu, parò, a immagginatzi pa un mamentu un avvucaddu, o una avvucadda, lu, o la, dentistha, lu, o la dirigenti d’ischora, lu sindaggu, o la sindagga, un assessori, o una, assessora, ipricà in Sassaresu inveci di l’itarianu. Saristhia un esenpiu chi po trazà tutta la sutzieddai a impriallu. E, ormai mi toccà viaggià di fantasia, mi piazaristhia sabé di ischrittori, e no soru pueti, masci e femmini, chi ischribini in sassaresu in modu d’abé un corpus letterariu chi aggiuddia l’idioma nosthru a giumpì pienamenti lu status di linga.

In cuncrusioni, è di ammittì chi so li sassaresofoni matessi a diarettizà e a punì i’ l’ischarinu più basciu lu sassaresu. E chistha avveru chi è una varghogna!

Fabritziu Dettori

Illusthrazioni di Salvatore Palita