La visthimenta sassaresa

So ancora in tanti li chi credini chi la visthimenta e lu visthiri sassaresi, li chi pudimmu mirà i’ La Cavalcadda e in althri manifesthazioni, siani un’invintzioni. È intradda in cabbu la cultura chi Sassari no l’aggia mai auddi. E so ancora umbè li passoni chi, itarianofiri di fuimmazioni, no perdhini occasioni pa dì chi l’identiddai culturari e linghisthigga di Sassari no so sardhi. Un macchini chi vo, a fotza, Sassari una tziddai itariana (cuntinentari) cassisia, fóra di la Sardhigna, e chi à generaddu fintzamenta una noimma linghisthigga ideorogica chi vo obbriggà a trattà l’alfabetu itarianu pa lu sassaresu. Sassari parò è sardha e la linga soia è sardha di famiria. Un’ipia chi proba la sardhiddai di la tziddai è, puru, lu visthiariu soiu chi, a ischumbattu di l’althri sardhi, è lu più documentaddu puru. Una tisthimuniantzia chi S’Iscola sarda e tandu Giampiero “Zampa” Marras, la bonanima, purthesini, daboi di anni d’isthudiu, a una mosthra i’ lu branu di lu 1980 a lu padiglioni di l’arthigianaddu di Sassari. Pa la primma voltha li sassaresi turrabani a vidè cumenti visthiani l’antigghi d’eddi, e liggì li pabiri nutariri di lu 1771, rimuniddi i’ l’archibiu d’Isthaddu di Sassari, rogaddi da lu notaiu Giuseppe Luigi Usai chi ischribia di lu visthiri e di la visthimanta.

La cronagga di tandu ischribia chi erani “Reperti isthorici di varori mannu chi mancu l’isthudiosi cunnisciani”. La rassegna cuntesi 37miria visitadori in un paggiu di cheddi, chena cuntà tutti li pitzinni d’ischora! Un patrimoniu culturari era abà visibiri a li sardhi, e in parthicurari a li sassaresi, cun li pinturi, calchunu a mannaria d’ommu, di Giuseppe Cominotti, Simone Manca di Mores, cu’ la colletzioni Luzzietti (digussì funtumadda, ma l’autori abisumeu era Agostino Verani), Baldassare Luciano, Alesssio Pittaluga e calche althru.

Giampiero Marras abia fintzamenta inteivisthaddu calche veccitta e veccittu chi diziani chi li giai la trattabani. Accò calche passu pigliaddu da La Nuova Sardegna di lu 18 di lampada 1980: “Caterina Sassu, sassaresa di 82anni, à dittu chi la mamma, mortha 38anni adabà, li cuntaba chi candu era pitzinna li pisciaggiori di Sassari, a li tempi soi, erani visthuddi tutti cu’ lu custhummu di la tziddai (barretta a cecciu, cugliettu in peddi, capottinu o gabbanu, corittu, pantaroni corthi in furesi (ragas), pantaroni di linu, ghetti di furesi). Giuseppe Chessa, sassaresu di 80anni ammenta eddu puru lu custhummu di Sassari: barretta a cecciu, […] cugliettu, camisgia cu’ li buttoni, cupioru a lu coddu, areccina d’oru a un’arecci. Lucia Manca Polo di 92anni, sassaresa, ch’isthazi in via Don Minzoni, ammenta umbè bè lu giaiu paternu chi, candu edda abia tzinc’anni, i’ lu 1891, si punia lu custhummu tipiggu cussì cumenti althri antziani. Abiani: camisgia bianca cun una ipezia di faldha, li famosi ragas e lu barrettu, un barrettu longu chi faraba i’ l’ipaddi. Puru la sozara di unu tziu si punia lu custhummu di la tziddai: vardhetta umbè largha, a piggi, panneddu, una ipezia di gianchetta e muncaroru i’ l’ipaddi e no in cabbu. Maria Pia Farbo, sassaresa, à prisintaddu inveci un rittrattu [foto] di famiria (di la fini di l’800) indì lu bisaiu era ‘sthaddu ritrattaddu [fotografaddu] cun lu custhummu, umbè simiri, i’ la caratteristhigga, a chissu deschrittu primma. Chiara Coradduzza, sassaresa, ammenta, chi abia parthecipaddu cu’ lu custhummu femmininu di Sassari, eritaddu da la giaia, i’ lu 1919, a una festha manna. Lu custhummu era fattu digussì: tucché nieddu, muncaroru ruiu in cabbu, cossu cu’ l’isthecchi, corittu ruiu, camisgia ricamadda, umbè sizidda i’ lu cóipu, vardhetta ruia longa e plisettadda cun un prifagliu (balza) biaittu [blu], muncaroru sciallato a trianguru i’ l’ipaddi. […]”.

Insomma, la manera traditziunari di visthì di Sassari è avvaruradda bè, e dizi puru chi, francu pa calche parthicurari, assumiglia a chissa di lu Logudoru.

A doru mannu, l’“intellighenzia” e li sotzi culturari di Sassari di tandu no desini a l’isthudi di Zampa l’impurthantzia chi mirisciaba. Abarà a assé lu prufissori Giuseppe Desole, umpari a lu Liceu iscientifiggu Guglielmo Marconi e lu Comuni, a cunfetziunà torra lu visthiariu di li sassaresi e purthallu a La Cavalcadda i’ lu 2003 cu’ lu “Gruppo Folk Città di Sassari”. Lu prufissori, fundatori e prisidenti di chissa assutziazioni, abiani offerthu pa la primma voltha a Sassari una bedda purradda di cultura. Era, infatti, da lu 1899, candu chissu Umberto I di Savoia re d’Itaria giumpisi in Sassari pa l’innaugurazioni di lu monumentu a Vittorio Emanuele II, chi la visthimenta e lu visthiri sassaresi no si vidiani. È ‘sthadda una cosa avveru impurthanti acchì à criaddu in tanti la cussentzia, e a ca l’abia l’à fatta ancora più forthi, chi Sassari è Sardhigna e chi appartheni a edda in tuttu e pa tuttu. Oggi tzi so in tziddai arumancu sei sotzi culturari e folkloristhigghi chi l’impreani e la varorizani umpari a lu baddu sardhu. Pa Sassari è una sienda manna.

I’ l’antigghiddai era impriadda in manera normari, e ciambava a sigunda si era una dì di festha o di trabagliu, da la faculthai o di la crassi sutziari. Li chi abiani li dinà si puniani, pa esenpiu, li buttoni d’oru o di pratta e lu tissuddu era chissu di varori. Ripittà, tandu, lu chi era, chena immintiggà parò, cument’ à ischrittu lu prufissori Desole i’ lu libru “Il vestiario tradizionale di Sassari” isciddu i’ lu 2005, “Chi semmu fabiddendi di l’abbigliamentu di lu poburu e no di dibisi”.

Tandu, visthimenta o “costume”? Abesumeu tuttu è cundiziunaddu da lu sintiddu e da l’assibisthu chi dugnunu à pa la cultura soia. Lu chi trattemmu pa cuiubatzi lu ciamemmu “abito” acchì in chissa dì caggi un eventu veru di la vidda. Piglia l’innommu di “costume” lu chi sevvi a recità una parthi, cumenti in un’iscena teatrari, in Halloween, a carrasciari. A dugnunu di noi, tandu, l’isciobaru di cuarificallu a lu primma o a lu di dui ordhini.

Li chi so ‘sthaddi riarizaddi so chissi di l’orthuranu, l’orthurana, chissa di lu tzappadori, chissi di li festhi, chissa di la sivvidora, di lu carraioru, e althri ancora, e tutti so inteipretazioni di chissi tisthimuniantzi “fotografaddi” da l’autori funtumaddi. Li pinturi, fatti da artisthi dibessi tra lu 1825 e lu 1880, so cunfoimmi tra eddi a rapprisintà la consuetudini di li sassaresi a mantinì chissi usantzi visthimentari. In tutta la rassegna di li cuaddri si po nutà cumenti a li pintori intaressaba dà immagini a chissu sardismu culturari risisthenti, ma a lu matessi tempu vinia rigisthradda la transitzioni, cumenti i’ l’acuarelli di “La dì di la nebi” di Cominotti, o “Ammentu di lu giardhinu pubriggu di Sassari” di Simone Manca, di la moda noba chi da Parigi era intrendi lesthra a Sassari ‘ià a middai di l’800 cu’ l’accudiddi da l’Itaria.

Lu corredu visthimentariu si po mirà inné lu Museu di Paratzu di Tziddai farendi in Piatza (corsu Vittorio Emanuele) i’ l’ipusizioni isthirridda in dui piani indì passoni cuarificaddi accumpagnani e ipiegani l’isthoria, l’evoruzioni, di chissa etnitziddai a li visitadori. Lu Comuni parò dubaristhia pinsà puru, pa dà più varori a lu museu, di punì la didascharia in sassaresu, e di dedicalli un’ischeda i’ lu situ isthitutziunari soiu.

La femmina visthia: veru di tulle, muncaroru di cabbu; la caretta; la fardhara; lu cossu; lu corittu/curittu; la fardhetta; li catzetti; li botti, lu panneddu.

L’ommu: la barretta (barrettu) a cecciu; berritta; barrettu a camauro (un ipezia di sumbreru); la camisgia; lu cuipettu; lu cugliettu; lu tzipponi; lu gabbanu; li pantaroni di furesi (ragas); li pantaroni di linu; li ghetti; li botti.

Li materiari erani lu furesi, lu cuttoni, la peddi, lu linu e lu tutziuberu (vellutto).

La cosa bedda di la visthimenta e di lu visthiri è l’emutzioni chi dazini a li passoni candu si la ponini, chi sia la primma voltha o no. Abesumeu è che abé la bandera di la sardhiddai chi affiagna cun isthima tutta la passona.

Fabritziu Dettori