Ecògrafu nou pro s’ispidale de Lanusè
Su machinàriu permitit de cumprovare sa risposta elàstica de su fìgadu e de visualizare a fine sos flussos sanguignos
In su repartu de radiologia de s’ispidale Nostra Signora della Mercede de Lanusè est arribadu un’ecògrafu nou. Su machinàriu, comente at naradu su diretore de su repartu Mariano Tangianu, permitit de cumprovare sa risposta elàstica de su fìgadu e de visualizare a fine sos flussos sanguignos.
In prus tenet s’echipagiamentu pro fàghere sas biopsias. Su diretore de su presìdiu ospedalieru Luigi Ferrai at annuntziadu ca sunt arribados e ant a arribare finas unu tomògrafu e machinàrios pro sa mineralografia òssea computerizada e pro sa risonàntzia magnètica nucleare.
Totu su repartu de radiologia est in fase de ristruturatzione e a presse at a retzire aterunu ecògrafu, chi, narat su diretore de sa Asl Andrea Marras, at a megiorare sa calidade de su servìtziu.
