Istudiante terranoesu in finale de sos Campionados Italianos de Economia
Pietro Satta, de s'Istitutu Tècnicu Attilio Deffenu, at bintu sa seletzione regionale
S’istudiante terranoesu Pietro Satta at bintu, in sa categoria senior, sa seletzione regionale de sos Campionados Italianos de Economia e Finàntzia, riservados a sas iscolas. Como at a partetzipare a sa fase natzionale chi ant a fàghere in Torinu su 9 de maju.
Sa categoria senior fiat riservada a su segundu biènniu de litzeos e istitutos tècnicos e a su de tres e su de bator annos de sos istitutos professionales. Sa prova, fata su 20 de martzu, duraiat un’ora.
Satta, 18 annos, istùdiat in sa IV classe Amministratzione, Economia e Finàntzia de s’Istitutu Attilio Deffenu de Terranoa, dirìgidu dae Stefano Stacca. Dd’at acumpangiadu in custa esperièntzia sa professora Paola Nieddu paris cun sas collegas Maria Rita Pazzola e Silvia Pedoni.
Custos Campionados sunt nàschidos in su 2018, pro more de su Comitadu pro sa programmatzione de sas atividades de educatzione finantziària, istituidu dae su Ministèriu de s’Economia in collaboratzione cun sos Ministèrios de s’Istrutzione e de s’Isvilupu Econòmicu e cun sos Ufìtzios Iscolàsticos Regionales.
(gm)
