Parma de oro onorària in Cannes a s’Istùdiu Ghibli

Su Festival de su tzìnema at a premiare s'òpera in s'animatzione de sos maistros giaponesos

Su Festival de Cannes at annuntziadu ca sa Parma de oro onorària ocannu dd’ant a bìnchere s’istùdiu de animatzione giaponesu Ghibli e su regista istadounidensu George Lucas.

Fundadu in su 1985 dae Isaho Takahata, Hayao Miyazaki, Toshio Suzuki e Yasuyoshi Tokuma, s’Istùdiu nipònicu at produidu pellìculas intrada in s’istòria de su tzìnema e non de animatzione ebbia.

Dae Laputa – Castello nel cielo, de su 1986, finas a Il ragazzo e l’airone, passende pro Il mio vicino Totoro, Princess Mononoke e Porco Rosso, intre sos àteros, su Ghibli at cunfirmadu sos resurtados mannos otènnidos in antis dae su paisu asiàticu cun sas diferentes sèries de cartones animados, chi ant conchistadu finas sos pitzocheddos de Europa dae sa segunda metade de sos annos ‘70 de su sèculu coladu.

Sa presidente de su Festival, sa tedesca Iris Knobloch, e su delegadu generale, su frantzesu Thierry Frémaux, ant ammentadu ca est sa prima borta chi su prèmiu andat a un’istitutzione e no e una persone.

Ant agiuntu ca s’Istùdiu Ghibli at fatu in modu chi «su tzìnema de animatzione siat bìvidu comente una de sas aventuras mannas de sa tzinefilia, intre traditzione e modernidade».

Sa de 77 editziones de su Festival de Cannes est in programma dae su 14 a su 25 de maju. Sa Parma de oro onorària, cun denominatziones diferentes, est andada sos annos passados a personalidades che a Ingmar Bergman e a Clint Eastwood.

Duos de sos filmis de s’istùdiu Ghibli ant bintu s’Oscar comènte mègius pellìcula de animatzione: La città incantata, in su 2002 e Il ragazzo e l’airone in su 2024. Ambos duos cun sa regia de Hayao Miyazaki. La città incantata in su matessi annu at bintu s’Ursu de oro in su Festival internatzionale de su tzìnema de Berlinu. In su 2005 a Miyazaki etotu dd’ant premiadu in sa Mustra internatzionale de arte tzinematogràfica de Venètzia cun su Leone de oro a sa carriera.

(gianni muroni)

Articoli Correlati

Lascia un commento

Il tuo indirizzo email non sarà pubblicato. I campi obbligatori sono contrassegnati *

Pulsante per tornare all'inizio