Pàliu de Siena, sa de ùndighi vitòrias pro Tittia

Su Pàliu de trìulas est andadu a sa contrada de s’Oca, chi si cunfirmat, cun 66 triunfos, sa prus vitoriosa de s’istòria. Sos caddos ant curtu oe 3 ca eris, sa die istabilida, s’abba ruta fache a sas 3 de sero at infustu sa pratza, causende su rinviu.

S’acopiada chi at garantidu custu èsitu fiat cumposta dae su caddu Diodoro, a s’esòrdiu, e dae su cadderi Giovanni Atzeni, mutidu Tittia.

Pro su sardu, cun babbu de Nurri e mama tedesca, est sa de 11 vitòrias, sa de 4 cun s’Oca.

A pustis de una mesora dae s’alliniamentu initziale, chi in s’ìnteri sos caddos sunt istados fatos essire una bona pariga de bortas, sa contrada de rincorsa, Valdimontone, est intrada in mesu de sos cànnaos.

S’Oca est partida luego in prima positzione e Atzeni no dd’at lassada finas a sa fine, binchende cun unu bonu tretu dae su segundu.

A pustis de àere afestadu su caddu e su cadderi sos contradajolos sunt intrados in possessu de su Pàliu, chi pro custa editzione dd’at pintadu Riccardo Manganelli.

Custos sos caddos e sos cadderis in gara:

Bruco: Viso d’Angelo, cun Jonatan Bartoletti, mutidu Scompiglio

Chiocciola: Tale e Quale, cun Giosuè Carboni, mutidu Carburo, de Bortigale

Drago: Campedo, cun Michel Putzu, mutidu Spago, de Teti

Istrice: Dorotea Dimmonia, cun Andrea Bruschelli, mutidu Bellocchio

Lupa: Ares Elce, cun Antonio Francesco Mula, mutidu Shardana, de Olìana

Oca: Diodoro, cun Giovanni Atzeni, mutidu Tittia, de Nurri.

Pantera: Arestetulesu, cun Francesco Caria, mutidu Tremendo, de Biddanoa Franca

Tartuca: Zio Frac, cun Carlo Sanna, mutidu Brigante, de Sindia

Selva: Zenis, cun Andrea Sanna, mutidu Virgola, de Olìana

Valdimontone: Comancio, cun Giuseppe Zedde, mutidu Gingillo, seneseu de ratza de Noragùgume

(gianni muroni)