Corpus Domini, Sassari à prigaddu Nosthru Signori

Dumenigga è isthaddu ziribraddu lu Corpus Domini puru in Sassari. A parthi in sera, dabboi li setti, è parthudda da Santu Niggora la surenni pruzzissioni, cu’ tutti canti li gremi, li cunfrarii, li Cabaglieri di Malta, li Cabaglieri di lu Santu Sipurchru, l’assuzziazioni di vuruntariaddu e li gruppi di li parrocchii, lu creru, li fraddi, li monzi e lu Capituru Turritanu. Lu Santissimu era purthaddu da l’arzibeschamu Franzischu Antoni Soddu, lu baldhacchinu inveci, sigundu la tradizioni, era daddu in cunsegna a lu Gremiu di li Viaggianti. La musigga era sunadda da lu Corpo Bandistico Luigi Canepa.

L’accompagnamentu mannu a Nosthru Signori è arribiddu in piazza d’Italia pa’ l’ulthimu mamentu di li ritu ririgiosu. «Semmu inogghi pa’ ziribrà Gesù Cristhu – à dittu monsigno’ Soddu –. In chistha cuncrusioni di la pruzzissioni di la Santissima Eucaristhia voraristhia turrà grazia a voi acchì umpari abemmu onoraddu a lu coipu di Nosthru Signori. No lampemmu la so’ binidizioni, rimanemmu a lu so’ seiviziu». L’azzibeschamu à elevaddu lu Santissimu pa’ la binedizioni finari, cu’ li ririgiosi, cuminzendi cu’ lu vicariu monsigno’ Antoni Tamponi, inginocciaddi affaccu a eddu. Drentu a l’osthensoriu era postha un’osthia cunsacradda. Dabboi la fini di la pruzessioni è isthadda puggadda e rimunidda da unu di ziribranti.

So isthaddi cantaddi lu “Tantum Ergo” e lu “Christus vincit”. L’amminishrazioni cumunari era rapprisintadda da l’assessori Maria Francesca Fantato in fascia tricurori.

In Itaria la surennidai di lu Corpus Domini no è più dì di festha, ma è ziribradda i’ la sigunda dumenigga dabboi la dumenigga chi sigi la Pentecoste. So chisthi li noimmi ginirari pa’ l’annu liturgicu. Finz’a lu 1978 inveci era dì di festha e la pruzzissioni era unu di li eventi ririgiosi più impurthanti di lu calendariu cattolicu.

(lf)

Attività realizzata col contributo della Regione Sardegna – IMPRENTAS 2025-2026. LR 22/2018